ڕێككەفتنا پەترۆلی د ناڤبەرا بەغدا و هەرێمێ دا هاتە ئیمزاكرن
ئەڤرۆ
دوهی سێشەمبی 4/4/2023 ڕێككەفتنا پەترۆلی د ناڤبەرا مەسرور بارزانی، سەرۆكێ حوكمەتا هەرێما كوردستانێ و محەمەد شیاع سۆدانی، سەرۆكێ حوكمەتا فیدرالی یا ئیراقێ هاتە ئیمزاكرن.
پشتی ئیمزاكرنا ڕێككەفتنێ د ناڤبەرا واندا، مەسرور بارزانی و محەمەد شیاع سۆدانی د كۆنگرەیەكێ ڕۆژنامەڤانی یێ هەڤپشك دا ئەنجامدا و تێدا سەرۆكێ حوكمەتا هەرێما كوردستانێ ڕاگەهاند، دەست ژ هیچ مافەكێ دەستووری یێ خوە بەرنادەین.
دەقێ ئاخڤتنێن مەسرور بارزانی د كۆنگرەیێ ڕۆژنامەڤانی یێ هەڤپشك دا ل گەل محەمەد شیاع سۆدانی:
بێگومان ئەڤ ڕێككەفتنە، ڕێككەفتنەكا گرنگە بۆ هەموو خەلكێ ئیراقێ، دخوازم دەستخوەشیێ و سوپاسیا سەرۆك وەزیرێن ئیراقێ بكەم، هەروەسا پیرۆزباهیێ ل هەموو خەلكێ ئیراقێ و خەلكێ هەرێما كوردستانێ بكەم بۆ ڤێ ڕێككەفتنا گرنگ كو ب دیتنا من دشێت ببیتە بنەمایەك بۆ بودجەی و هەتا قانوونا پەترۆل و غازێ ژی هەكە ب شێوەیەكێ ڕێكوپێك بهێتە بجهئینان، ئەڤە وەكو بنەمایەك بهێتە بكارئینان.
بێگومان پشتی ڕاوەستیاندنا هنارتنا پەترۆلا هەرێما كوردستانێ، زیان تنێ ب خەلكێ هەرێما كوردستانێ نەكەفتیە، بەلكو زیان ب هەموو خەلكێ ئیراقێ كەفتیە. نوكە ئەو ئالیەتە بۆ دووبارە هنارتنا پەترۆلا كوردستانێ، دێ بیتە داهاتەكێ زێدەتر بۆ هەموو ئیراقێ و ئەم هەموو دشێین تێدا د مفادار بین.
خوازم هەموو ئالیەكی پشتڕاست بكەم كو ژ دەستپێكێ نیەتا مە بۆ وێ چەندێ بوو بگەهینە ڕێككەفتنەكا باش د ناڤبەرا حوكمەتا فیدرالی و حوكمەتا هەرێما كوردستانێ دا، بێی كو ئەم دەست ژ هیچ مافەكێ دەستووری یێ خوە بەردەین، بەلكو ئەڤ ڕێككەفتنە بهێزكرنا پەیوەندیێن حوكمەتا فیدرالی و هەرێما كوردستانێ یە ل سەر بنەمایێ دەستووری و ئەو قانوونێن بەركار یێن هەین.
دخوازم سوپاسیا سەرۆك بارزانی بكەم بۆ وێ باوەری و پشتەڤانیا بەردەوام یا ب مە هەی، هەروەسا سوپاسیا سەرۆكێ هەرێما كوردستانێ دكەم بۆ پشتەڤانیا وی یا بەردەوام بۆ ڤێ پرۆسەیێ، سوپاسیا وان هەموو بەرێزان ژی دكەم كو ڕۆلەكێ كاریگەر و ئەرێنی هەبوو د سەرئێخستنا ڤێ پرۆسەیێ. سوپاسیا شاندێ حوكمەتا فیدرالی دكەم بۆ پشتەڤانیا وان بۆ ڕێككەفتنێ ل گەل شاندێ مە. هەروەسا سوپاسیا شاندێ هەرێما كوردستانێ ژی دكەم كو د ڤی دەمی دا ب شێوەیەكێ چر شیاین ڤان دانوستاندنان بگەهیننە ئەنجام كو خێرا هەموو خەلكێ ئیراقێ تێدا بیت.
سوپاسیا سەرۆك وەزیران دكەم كو ب ڕاستی وەكو سەرۆك وەزیرێن هەموو ئیراقێ كو د بەرژەوەندیا هەموو خەلكێ ئیراقێ ب خەلكێ هەرێما كوردستانێ ژی ڤە ل بەرچاڤ گرتیە و دبن چاڤدێریا وی ئەڤ ڕێككەفتنە هاتە ئیمزاكرن. هیڤیدارم و یێ پشتڕاستم ژی كو دێ مفا بۆ هەموو خەلكێ ئیراقێ هەبیت.
د بەرسڤا چەند پرسیارێن ڕۆژنامەڤان ژی د چارچۆڤەیێ كۆنگرەیێ ڕۆژنامەڤانی دا، سەرۆكێ حوكمەتا هەرێما كوردستانێ گوت» ئەڤ ڕێككەفتنە ڕێككەفتنەكا دەمكی یە، بەلێ هەموو بنەمایێن ڤێ ڕێككەفتنێ دیسان د بودجەی و قانوونا پەترۆل و غازێ ژی دێ ڕەنگڤەدەن، ژبەر وێ چەندێ بجهئینانا ڤێ ڕێككەفتنێ ب شێوەیەكێ ڕێكوپێك دێ بیتە بناغەیەك بۆ وێ ئێكێ مفای ژێ وەربگرین د داڕێشتنا قانوونا پەترۆل و غازێ ژی».
د بەرسڤا پرسیارەكێ دا كو گەلەك جاران ڕێككەفتن هاتینە كرن و نەهاتینە بجهئینان، و هندەك جاران گازندە هەبوو كو دەستوور نەهاتیە بجهئینان، وئایا ئەڤ ڕێككەفتنە دێ بیتە ئەگەر كو پشكەك ژ كێشەیان ل گەل بەغدا بهێنە چارەسەركرن ب تایبەتی پرسا پەترۆل و غازێ، مسەرور بارزانی گوت» ڤێجارێ یێ پشتڕاستم ب بەرهەڤبوونا سەرۆك وەزیرێن ئیراقێ، ئەڤ ڕێككەفتنە دێ وەكو خوە هێتە بجهئینان، هیڤیدارم ئەو تیمێن كو دێ هێنە ڕاسپاردن بۆ چارەسەركرنا بابەتێن تەكنیكی یێن بجهئینانا ڤێ ڕێككەفتنێ، لەزێ بكەن د تمامكرنا ڤێ پرۆسەیێ بۆ وێ چەندێ ئێدی خەلكێ ئیراقێ ب هەرێما كوردستانێ ژی ڤە زیاندار نەبن و یێ پشتڕاستم ئەڤە دێ دەستپێكەكا باشتر بۆ هاریكاریێ و پێكڤە كاركرنێ».
محەمەد شیاع سۆدانی، سەرۆك وەزیرێن ئیراقێ د وی كۆنگرەیێ ڕۆژنامەڤانی دا گوت» ڕێككەفتنا د ناڤبەرا بەغدا و هەولێرێ دا بۆ هەموو ئیراقێ یا گرنگە و پشتی ئیمزاكرنا وێ ئێكسەر دێ هێتە بجهئینان، هنارتنا پەترۆلا هەرێما كوردستانێ د مفایێ هەموو ئیراقێ دایە و ڕاگرتنا وێ د بەرژەوەندیا هیچ ئالیەكی دا نەبوو».
گوت ژی» ئەڤ ڕێككەفتنە ئاماژەیە بۆ خواستا هەردو ئالیان بۆ ڕوو ب ڕووبوونا هەموو وان ئاستەنگ و كێشەیێن هەلاویستی كو ل چەند سالێن بۆری د ناڤبەرا هەردو ئالیان دا هەبوون، بگەهینە چارەسەریەكا بنەرەتی و بگەهینە ڕێككەفتنەكێ كو مفا بۆ هەموو گەلێ ئیراقێ ل هەرێما كوردستانێ و هەموو پارێزگەهێن دی ێن ئیراقێ هەبیت».
سۆدانی دیاركر ژی» شاندێ حوكمەتا هەرێما كوردستانێ و حوكمەتا فیدرالی دێ بەردەوام بن بۆ بجهئینانا ئالیێ تەكنیكی یێ ڕێككەفتنێ و گەهشتن ب ئەنجامەكێ باش، من ئومێدەكا باش یا پێ هەی».
