ئەڤرۆ پرۆڤەیا ئۆرۆپا بۆ كلاسیكۆیێ و حسابێن ئالۆز د كۆمێن مرنێ دا دێ دەستپێكەن
چاڤەڕێ دهێتە كرن ئەڤرۆ دەست ب هەڤڕكیێن گەڕا سێیێ ژ قۆناغا ئێكێ یا قارەمانییا یانەیێن ئۆرۆپا قارەمانێن خولا چامپیۆنز ب ئەنجامدانا هەشت یارییان ژ چار كۆمێن ئێكێ بهێنە كرن، یاریێن ئەڤ شەڤە ژی ئاگرین و یێن مرنێ نە بۆ هندەك یانەیا پێخەمەت ڤەگەڕاندنا هیڤییان بۆ پلێتا دەربازبوونێ بەر ب قۆناغا 16ێ یا قارەمانیێ.
د كۆما ئێكێ دا.
د ئەركێ ب زەحمەتە بڕیارە یانەیا بایرن میۆیخ یا ئەلمانی دێ بەر ب وەلاتێ توركیا ڤە چیت ژبۆ ئەنجامدانا یارییا خوە بەرانبەر خودانێن ئەردی گەلاتا سەرایی ئەوا دێ ل دەمژمێر 7:45 شەڤ هێتە كرن، یانەیا بافاری ب شەش خالان سەرێ لیستا كۆمێ دهێت و گەلاتا ب چار خالان رێزا دویێ دهێت، ئەڤ یارییە تاقیكرنەكا ب سانەهی نابیت بۆ ئەلمانا بەرانبەر مۆرالا خودانێن ئەردی ئەوێن دیچ ب پشتگەرمییا یاریزانێن خوە شەڕی بۆ سێ خالان كەن پێخەمەت دەستڤە ئینانا سەرێ لیستێ، لێ ئەو شارەزاهییا بایرنێ هەیی دبیت ببیتە رێگر بەرانبەر ئارمانجا وان، هەرچەندە ئەڤ یارییە دبیتە یا سێیێ د دیرۆكا هەردو یانەیان دا و یا ئێكێ پشتی پێنجی سالان، گەلاتا شیابوو دناڤ ئەردێ خوە دا ب گۆلەكێ وەكهەڤ بیت، لێ یاریا دویێ دا بایرنێ شیابوو ب شەش گۆلان بێ بەرانبەر سەركەفتنێ بینت، د یارییا دویێ یا ڤێ كۆمێ دا مانچستەر یۆنایتد یا ئنگلتەرایێ چو بژاردە نینن ژبلی سەركەفتنێ ژبۆ ڤەگەڕاندنا هیڤیێن پلێتا قۆناغا 16ێ دەمێ ل یاریگەها خوە مێڤاندارییا یانەیا كۆبنهاگن یا دانیماركی دكەت، مان یۆنایتد ژ دو یاریێن كۆمێ چو خال كۆم نەكرینە رێزا چارێ دهێت، بەرانبەر د ابتنێ وەكهەڤییە یانەیا كۆبنهاگن یا هەیی و رێزا سێیێ دهێت، ئانكو دێ یارییا مرنێ و شەڕی بۆ سێ خالێن یاریێ بیت، ئەڤ یارییە دێ ل دەمژمێر 10ی شەڤ هێتە ئەنجامدان.
د كۆما دویێ دا
یاریێن ئەڤ شەڤە یێن ڤێ كۆمێ دێ ئاگرین بن، سیڤییا یا ئسپانی د ئەركەكێ گەلەك بزەحمەت دا یە دەمێ ل یاریگەها خوە مێڤاندارییا ئارسنال یا ئنگلتەرایێ دكەت، هەردو یانە بەربژارن بۆ دەربازبوونێ ژ قۆناغا كۆمان لێ هەلوەستێ وان د كۆمێ دا هەردو دێ شەڕی بۆ رێزێن ئێكێ كەن، ئارسنال سێ خال هەنە و رێزا دویێ دهێت، سیڤییا دو خال كۆمكرینە و رێزا سێیێ دهێت، ئانكو دێ یارییەكا هەڤڕكی و ئاگرین بیت بۆ سەركەفتنێ كو دهێتە هژمارتن ئێك ژ یاریێن ئاگری یێن ئەڤ شەڤە، ژلایێ خوەڤە خودانا سەرێ لیستا كۆمێ لانس یا فرەنسی دێ بزاڤێ كەت بەردەوامیێ بدەتە سۆپرایزان و پاراستنا رێزبەندیا خوە كەت ئەوا نوكە ب چار خالان رێزا ئێكێ دهێت، لێ تیما مێڤان ژی چو رێك نینن ژبلی شەڕێ مرنێ بۆ سەركەفتنێ ئەوا بتنێ ئێك خال كۆمكرین و رێزا چارێ دهێت، هەردو یاری دێ ل دەمژمێر 10 شەڤ هێنە كرن.
د كۆما سێیێ دا
یانەیا ریال مەدرید ئێك ژ بەربژارێن بهێز نە بتنێ بۆ دەربازبوونێ بەر ب قۆناغێن دووماهیێ بەلكو یا سەرەكی یە بۆ دەستڤە ئینانا چامپیۆنزا ئەڤ سالە، یارییا وێ یا ئەڤ شەڤە دێ بیتە مێڤانەكا بارگران بۆ یانەیا سپۆرتینگ براگا یا پۆرتۆگالی، یانەیا ئسپانی شەش خال كۆمكرینە و سەرێ لیستێ دهێت، خودانێن ئەردی سێ خالان هەنە و دێ پشت گەرمی ب یاریگەهـ و جەماوەرێ خوە بیت ژبۆ دەستڤەئینانا سێ خالان و گەشكرنا هیڤیێن دەربازبوونێ، سەرباری باش دزانیت دیدارەكا ئاگرینە، ژلایێ خوەڤە یانەیا ناپۆلی یا ئیتالی هەڤڕكا دویێ یا ریالێ د كۆمێ دا دی ژ دەرڤەیی یاریگەها خوە بەرانبەر یۆنیۆن یا ئەلمانی بیت ئەوا بۆ جارا ئێكێ یە هاتییە چامپیۆنزێ، ناپۆلی خودانا سێ خالان ب درۆشمێ سەركەفتن دێ بەرانبەر یۆنیۆن بیت ئەوا بێ خالا رێزا دووماهیێ دهێت، بۆ زانین هەردو یاری دێ ل دەمژمێر 10ی شەڤ هێنە كرن.
د كۆما چارێ دا
ژلایەكێ دووڤە خەونا ئەنتەر میلان یا ئیتالی بۆ دەستڤە ئینانا ناسناڤی دێ د ئەڤ شەڤە دا ئێكلاكەت پشتی ل وەرزێ بۆری گەهشتییە یارییا دووماهیێ و خەونا وێ بجهـ نەهاتی و هەمی هیڤیێن وێ وەكو وەرزێ بۆری بگەهیتە دووماهیێ و خەونا خوە بجه بینت، ئەنتەر دێ شەڕێ مان و نەمانێ كەت بۆ سەركەفتنێ و هیڤیێن شكەستنا خودانا سەرێ لیستێ بیت، یانەیا ئیتالی ئەوا ب چار خالان رێزا دویێ دهێت دێ ل یاریگەها خوە مێڤاندارییا رێدبۆل سالزبۆرگ یا نەمسایی كەت خودانا سێ خالان و رێزا سێیێ دهێت ئەڤ یارییە دێ ل دەمژمێر 7:45 شەڤ هێتە كرن، ژلایەكێ دووڤە د دیارییەكا دی یا ئاگرین دا بەنیفیكا یا پۆرتۆگالی خودانا چنە خال دێ مێڤاندارییا ریال سوسیداد یا ئسپانی كەت ئەوا ب چار خالان زێدەتری گۆلان ژ ئەنتەرێ رێزا ئێكێ دهێت، ئەڤ یارییە دێ ل دەمژمێر 10ش شەڤ هێتە كرن.
