ئاكرێ و زاخۆ د ناڤ جەماوەرێ خوە دا دێ بزاڤێن سەركەفتنێ كەن
قەیس وەیس:
بڕیارە ئەڤرۆ چار یاریێن مایی ژ چارچووڤێ هەڤڕكیێن گەڕا سێیێ ژ قۆناغا ئێكێ یا خولا پلا نایابا كوردستانێ یا تەپا پێی ب دو دیدارێن ئاگرین بۆ یانەیێن پارێزگەهێ د ناڤ ئەرد و جەماوەرێ خوە دا ل دەمژمێر 2:30 پشتی نیڤرۆ بهێنە ئەنجامدان.
ل یاریگەها دەلال تیما یانەیا زاخۆ د ناڤ ئەرد و جەماوەرێ خوە دا دێ مێڤاندارییا یانەیا سیروانی نوو دا د بزاڤەكێ دا ژبۆ دەستڤە ئینانا سێ خالێن دی وبەردەودامی ل سەر ئەنجامێن خوە یێن باش، پشتی د یارییا بۆری دا دگەل یانەیا هەولێرێ ب گۆلەكێ بێ بەرانبەر سەركەفتی، كوڕێن خابووری پشتەڤانییا جەماوەرێ دێ بەرانبەر هەڤڕكا خوە یا رێزبەندیێ بن، ژبەركو زاخۆ خودانا چار خالانە رێزا چارێ دهێت، لێ سیروانی نوو ب هەمان خالان و زێدەتری دو گۆلان رێزا دویێ دهێت بەری ب دووماهی هاتنا یاریێن گەڕا سێیێ.
ژلایێ خوەڤە یانەیا ئاكرێ ئەوا د دەمەكێ هەستیار دا دەرباز دكەت پشتی ژ دو یاریێن بۆری خوسارەتی و وەكهەڤیەك هەیی بۆ یارییا ئەڤرۆ بەرانبەر رانیە دێ شەڕی بۆ سێ خالان كەت پێخەمەت رازیكرنا جەماوەرێ خوە ژبەركو دێ دناڤ ئەردێ خوە دا بیت، د نوكە دا بتنێ ئێك خال هەیە ل رێزا16ێ و دووماهیێ دهێت، ژلایێ خوە رانیە سێ خال هەنە و رێزا حەفتێ دهێت بەری ب دووماهی هاتنا گەڕا سێیێ ژ خولێ.
ژ یاریێن دی یێن ئەڤرۆ، شێروانە دێ ئارارات مێڤانكەت و برایەتی دێ بیتە مێڤانا هندرین.
