ل بەغدا ئاریشەیێن دارایی یێن یانەیێن كوردستانی هاتنە بەحسكرن
ل پێنج شەمبییا بۆری خالد عەبدولواحد گبیان راوێژكاری محەمەد شیاع ئەلسودانی سەرۆك وەزیرێن ئیراقێ دگەل سەرۆكێ هەر چار یانەیێن دهۆك، زاخۆ، هەولێر و نەورۆز كۆمبوون كر ژبۆ چارەسەركرنا ئەوا ئاریشەیێن دارایی یێن دكەڤنەد ڕێیا هەر چار یانەیێن كوردستانێ دا.
ئەڤچەندە هات پشتی ئەوان گازندەیێن یانەیێن ناڤهاتی كو ئەو مینحەیا سەرۆك وەزیرێن ئیراقێ بۆ هەموو یانەیێن پشكدار د خولا ستێرێن ئیراقێ دا هاتییە مەزاختن ژبلی یانەیێن كوردستانی كو بێ بەهر بووینە ژ پشتەڤانییا دارایی، راوێژكارێ سەرۆك وەزیرێن ئیراقێ بەرهەڤییا خوە دیاركر ل دووڤ راسپاردەیا محەمەد شیاع ئەلسودانی زووترین دەم ئاریشەیا دارایی یا یانەیێن كوردستانێ چارەسەركەن.
بۆ زانین ل دەستپێكا چڕیا ئێكێ یا سالا بۆری ب نڤێسارەكا فەرمی چیایی تەیمۆر عەبدال پەرلەمانتار ل سەر لیستا پارتی دیموكراتی كوردستان و سەرۆكێ لیژنەیا وەرزش و لاوان ل پەرلەمانێ ئیراقێ ب نڤێسارەكا داخواز ژ سەرۆكێ وەزیرێن ئیراقێ كربوو پشتەڤانییا دارایی بۆ هەر چار یانەیێن كوردستانێ دابینبكەت وەكو هەر16 یانەیێن دی ئەوێن بڕیار بوو هاتیە دان و بۆ رۆژنامەیا ئەڤرۆ د داخویانیەكێ دا دیار كربوو ژبەر شێوازێ خولێ و پێدڤیێن مەزن یێن مەزاختیێن پارایی ژ گرێبەست و مووچەیێ یاریزانێن بیانی و نافخوە، دیسان مووچەیێ كادرێ راهێنانێ دگەل پێدڤیێن یاریزانان و تیمێ یێن چلۆبەرگ و راهێنانێ، و مەزاختیێ گەشتێن تیمێ ژ پارێزگەهەكێ بۆ پارێزگەهەكا دی، لەوما ژبەركو ئەڤان یانەیان ئەو شیانێن دارایی نینن.
