هشیار شه‌هباز: ب هاتنا راهێنه‌رێ نوو دێ تیم به‌ر ب قۆناغه‌كا دیتر چیت
عەلی حاجی :
د داخویانیەکێ دا سکرتێرێ یانه‌یا زاخۆ بۆ رۆژناما ئەڤرۆ دیار کر ب هاتنا ڕاهێنەرێ نوو دێ ئاست و ئەنجامێن تیما وان د خولا نایابا کوردستانێ یا تەپاپێی دا باشتر بن و هێشتا دەلیڤەیا هەڤرکیێ مایە.
زێدەتر هشیار شەهباز گۆت: دەست ژکارکێشانا عەزەددین عەسکەر راهێنەرێ پێشتر یێ تیما مە یا پشکدار د خولا نایابا کوردستانێ یا تەپاپێی ل سەر داخوازیا وی ب خوە بوو ژبەرکو وی هندەک کێشەیێن خێزانی هەبوون و مە ژی نەڤیا رێگریێ لێ بکەین و دەست ژ کارکێشانا وی هاتە قەبیل کرن، بۆ یاریێن مایی ژ خولێ ئەم گەهشتینە ڕێکەڤتنێ دگەل ڕاهێنەرێ باژێرێ سێمێلێ محەمەد یوسڤ و مە باوەرییەکا مەزن هەیە کو دێ تیما مە شێت ئاست و ئەنجامێن باش ب دەستخوەڤە ئینن د خولێ دا و هێشتا دەلیڤەیا هەڤرکیێ ل سەر ناسناڤێ خولێ مایە و مە ژی تیمەکا باش و رێک و پێک هەیە، ئەم دێ ئەڤ سالە د جاما کوردستانێ ژی دا شەڕێ برنا ناسناڤی کەین و دێ یاریزانێن خوە یێن د خولا ستێرێن ئیراقێ ژی د وێ تیمێ دا زێدەکەین و مە پلانەکا تایبەت هەیە و پشت راستین دێ پلانا مە یا سەرکەڤتی بیت.
ناڤبری گۆت ژی: ب هاتنا راهێنەرێ نوو دێ تیم بەرەڤ قوناغەکا دیتر ڤە چیت و هەناسەیەکا دیتر د خولێ دا کێشیت و ئەم هەتا نوکە ژی ب ئارمانجا ب دەست ڤە ئینانا ناسناڤێ خولێ شەری دکەین.
