ب ده‌ستكه‌فته‌كێ نوو گاره ئالایێ كوردستانێ ل مسرێ بلند كر
بۆ جارا ئێكێ د دیرۆكا خوه و ئیراقێ دا تیما یانه‌یا گاره وه‌كو تاكه نوونه‌را كوردستانێ شیا رێزا دویێ یا قارەمانییا یانەیێن عەرەبی بۆ یارییا تیكۆنجتسۆ والسكی ل سه‌ر ئاستێ پێشكه‌فتیان ب ده‌ستڤه بینت، ئه‌وا هه‌ڤركیێن واندا ئه‌وا ل ئه‌ینییا بۆری پایتەختێ مسرێ قاهیره مێڤاندارییا وێ كری و 16 یانه‌یێن هه‌رپێنچ وه‌لاتێن ئیراق، مه‌غرب، فله‌ستین، ئوردن و مسر وه‌كو مێڤاندارا قاره‌مانیێ پشكداربوون.
نوونه‌را كوردستانێ شیا ب پێنچ یاریزانان پشكداربیت د كێشێن جودا و رێزێن ئێكێ و سێیێ بینت كو سێ میدالیێن زێری و دو یێن برۆنزی ب ده‌ستڤه بینت سه‌رجه‌مێ گشتی 13 خالان كۆمبكه‌ت، ژلایه‌كێ دووڤه ئه‌نجامێن یانه‌یێن دی یێن ئیراقێ بڤی شێوه‌یی بوون:
– یانه‌یا ئه‌لموسته‌قبه‌ل ئه‌لموشرق ل سه‌ر ئاستێ لاوان رێزا ئێكێ هات ب كۆمكرنا 25 خالان ژ حه‌فت میدالیێن زێری و دو یێن زیڤی.
– یانه‌یا تلسقوف ل سه‌ر ئاستێ ئاستێ كچان ب كۆمكرنا 10 خالان رێزا دویێ ب ده‌ستڤه ئینان ب ئینانا دو میدالیێن زێری و دو یێن برۆنزی.
– یانه‌یا شنگال لسه‌ر ئاستێ تازه‌پێگه‌هشتییان رێزا سێیێ هات پشتی حه‌فت خال كۆمكرین ژ ئێك میدالییا زێری و دو یێن برۆنزی.
ل دۆر ڤێ ده‌ستكه‌فتێ شێروان به‌شار سه‌رۆكێ یانه‌یا گاره بۆ رۆژنامه‌یا ئه‌ڤرۆ گۆت: پێخوه‌شحالین كوڕێن پارێزگه‌ها دهۆكێ و نوونه‌رێن كوردستانێ شیان ده‌ستكه‌فته‌كێ ژ هه‌ژی د قاره‌مانیه‌كا عه‌ره‌بی دا بینن و یا زێده‌تر ئه‌ز پێ خوه‌ش بوویم ئالایێ كوردستانێ د ناڤ قاره‌مانیێ دا به‌رانبه‌ر وه‌لاتێن پشكدار ژلایێ یاریزانێن مه ڤه هاتییه بلندكرن وه‌كو یانه‌كا كوردستانێ و رێزێن پێشیێ بهێت، ده‌ستخوه‌شیا كادرێ راهێنانێ و یاریزانان دكه‌م ئه‌ڤه ژی وێ چه‌ندێ دیاركه‌ت مه ل پارێزگه‌هێ وه‌رزشێن جودا هه‌نه و یاریزانێن خودان شیان.
