دخولا ئیراقێ دا دهۆكێ رێزا سێیێ بۆ زاخۆ هێلا و هەولێر پێشڤە هات
قەیس وەیس:
ب دووماهی هاتنا هەڤڕكیێن گەڕا 17 ژ خولا ستێرێن ئیراقێ یا فوتبۆلێ هەر سێ یانەیێن كوردستانی زاخۆ، دهۆك و نەورۆز رێزێن پێشیێ دهێن و یانەیا هەولێر پێشڤەچوونەكا باش دكەت، پشتی ب ئەنجامێن جودا د یاریێن خوە دا ب دەستڤە ئیناین ئەوا دووماهییا حەفتییا بۆری هاتینە كرن.
محەمەد ئەلسائید: جەماوەرێ زاخۆ و مۆرالا یاریزانان بوو ئەگەڕێ سەركەفتنێ
تیما یانەیا دهۆك رێزبەندییا سێیێ ژ دەستدا پشتی دگەل خودانێن ئەردی یانەیا مینا ب دو گۆلان تووشی خوسارەتیێ بوویی، د یارییا واندا ئەوا وەكو ئاستێ چاڤەڕێ كری یاریزانێن ئەلهۆیێن چیا نە هاتییە دیتن، پشتی ب دووماهی هاتنا یاریێ د پرێس كۆنفرانسێ رۆژنامەڤانی دا ئەحمەد خەلەف راهێنەرێ تیما یانەیا دهۆك دیار كر سەرباری خوسارەتییا تیما وی دگەل مینا لێ هێشتا ئەو د هەڤڕكیێ دانە و دێ بزاڤێ كەن جهێ خوە یا رێزا سێیێ ل سەر لیستا خولێ ڤەگەڕینن. و گۆت: ئەو وەستیانا ژبەر گەشتێن شاندێ تیمێ و نەبوونا دەمێ پێدڤی یێ بهێنڤەدانێ ژبۆ چارەسەركرنا یاریزانی و دیسان گڤاشنێن یارییان ل دووڤ ئێك د یاریێ دا دیاربوون و ئەم یاریێ بەرانبەر كۆمەكا یاریزانێن گەنج و بچووك ژلایێ عەمری ڤە بەرانبەر یاریزانێن مە دكەین، هەرچەندە پتر مە كۆنترۆلا یاریێ كربو ولێ یاریزانێن مینا زانین دێ چەوا خالان ب دەستڤە ئینن و ئاستێ وان ئەز مەندەهۆش كرم كو ئەو ئەگەرێ دەستڤە ئینانا خالان بوو.
ئەحمەد خەلەف: هێشتا ئەم یێ د هەڤڕكییا رێزێن پێشیێ دا
ژلایەكێ دووڤە تیما یانەیا زاخۆ سەركەفتنەكا گرنگ و دیرۆك ل سەر یانەیا زەورا ئینا ب گۆلەكێ بێ بەرانبەر ژلایێ پیشەكارێ وێ فرانك سیدریك د خولەكا 41ێ دا تۆماركری، د یارییا واندا ئەوا ل یاریگەها زاخۆ یا نێڤدەولەتی و زێدەتری 25 هزرا ژ جەماوەرێ كوڕێن خابۆری ل یاریگەهێ بەرهەڤبووین و پێشڤە بهێنە رێزا سێیێ ل سەر لیستا خولێ.
د پرێسكۆنفرانسێ رۆژنامەڤانی دا محەمەد ئەلسائد هاریكارێ راهێنەرێ زاخۆ گۆت: ئەڤ سەركەفتنە ب پشتەڤانییا جەماوەری هات و هەروەسان مورالا یاریزان ئەگەر بوو ئەوێن پێگیری ب هەمی رێنمایێن كادرێ راهێنانێ كرین و شیان ب گەهینە ئارمانجا خوە ئەو ژی سەركەفتن، سێ خالێن گرنگ بەرانبەر یانەیا زەورا دیرۆكە ژبەركو یانەكا مەزن و جەماوەری یە و بوو ئەگەر دێ بەردەوامیێ دەینە شەڕی بەر پێشڤە و هەڤڕكیێ.
ژلایێ خوەڤە یانەیا هەولێرێ سەركەفتنەكا مەزن ل سەر مێڤانا خوە ئەمانەت بەغدا ئینا ب چار گۆلان بەرانبەر گۆلەكێ، ئەڤ سەركەفتنە پێشكەفتنەكا باش د رێزبەندییا وێ دا پەیدا كر و ڤەگەڕیا دناڤ قۆناغا هەڤڕكیێن رێزێن پێشیێ كو پێنج رێزا پێشڤە هاتە یا 11ێ، د بەرانبەر دا تیما یانەیا نەورۆز ژی د چارگۆشەیا رێزبەندییا هەڤڕكیێن رێزێن ئێكێ دایە سەرباری وەكهەڤییا وێ ب گۆلەكێ بەرانبەر یانەیا شورتە قارەمانا وەرزێ بوری و رێزا پێنجێ دهێت.
ئەنجامێن یاریێن دی، تەلەبە چنە-1 حدود، كەرخ چنە-3 نەجەف، نەفت میسان چنە- چنە نەفت، جەویە چنە- چنە نەفت ئەلبەسرا، ئەلقاسم چنە-1 كەربلا، كارەبا 3-چنە نەفت ئەلوەسەت.
بۆ زانین هەتا نوكە ئەیمەن حسێن هێرشبەرێ یانەیا جەوییە ب 14 گۆلان سەرێ لیستا گۆلكەران دهێت، عەلائەدین ئەلدالی هێرشبەرێ نەفت ئەلمیسان ب نەهـ گۆلان رێزا دویێ دهێت، ب هەمان گۆلان ئیبراهیم غازی هێرشبەرێ حدود رێزا سێیێ دهێت، ل سەر ئاستێ یانەیێن كوردستانێ، هێرشبەرێ نەورۆز ئیبراهیم تۆمبۆا ب حەفت گۆلان رێزا هەشتێ دهێت، یێ هەولێرێ محەمەد قاسم ب شەش گۆلان رێزا نەهێ دهێت، یێ زاخۆ فرانك سیدریك ب چار گۆلان رێزا 15ێ دهێت و یێ دهۆكێ یانیك زاكێری ب سێ گۆلان رێزا 36ێ دهێت كو سەرجەمێ گشتی 153 یاریزانان گۆل كرینە.
دهۆك ل هەولێرێ و زاخۆ ل كەربەلا چاڤ ل سەركەفتنێ نە
دهێتە چاڤەڕێ كرن ئەڤرۆ هەتا چارشەمبییا بهێت یاریێن گەڕا 18ێ بهێنە كرن و بڤی رەنگی، ئەڤرۆ، حدود- هەولێر دەمژمێر 2:30 پتشی نیڤرۆ، نەفت- جەوییە، نەفت ئەلبەسرا- كەرخ، نەفت ئەلوەست- ئەلقاسم، شورتە- نەفت میسان، رۆژا سێ شەمبی، دهۆك- كارەبا یاریگەها شەهید فرانسۆ حەریری دەمژمێر پێنجێ ئێڤاری، كەربەلا- زاخۆ دەمژمێر 5ێ ئێڤاری، نەجەف- نەورۆز دەمژمێر 7:30 شەڤ. رۆژا چارشەمبی زەورا بەرانبەر تەلەبە دەمژمێر 5ێ ئێڤاری.
هەلوەستێ گشتی یێ خولێ بڤی رەنگی یە:
1- جەویە 41 خال.
2- شورتە 36 خال.
3- زاخۆ 28 خال.
4- دهۆك 27 خال.
5- نەورۆز 27 خال.
6- زەورا 26 خال.
7- تەلەبە 26 خال.
8- نەفت 24 خال.
9- نەفت میسان 23 خال.
10- حدود 23 خال.
11- هەولێر 20 خال.
12- مینا 20 خال.
13- نەجەف 20 خال.
14- كەربەلا 19 خال.
15- كارەبا 19 خال.
16- نەفت ئەلبەسرا 18 خال.
17- كەرخ 14 خال.
18- ئەمانەت بەغدا 12 خال.
19- ئەلقاسم 11 خال.
20- نەفت ئەلوەسەت حەفت خال.
