باسكێت بۆلا گارە دێ ب پلان ڤەگەڕیت
د داخویانیەكێ دا سەرۆكێ یانەیا گارە یا وەرزشی بۆ رۆژنامەیا ئەڤرۆ دیار كر ب فەرمی ئەوان پلانەكا دووم درێژ بۆ دروستكرن و ڤەگەریانا تیما وان یا باسكێت بۆلێ بۆ چالاكیێن كوردستانێ و ئیراقێ دانایە و دێ پشت گەرمیێ ب كوڕێن باژێرێ خوە كەن.
زێدەتر شێروان بەشار گۆت: پشتی لڤێ دووماهیێ دگەل كادرێ نوو یێ راهێنانێ بۆ تیما خوە یا باسكێت بۆلێ كۆمبووین گەنگەشە ل سەر چاوانییا دانانا پلانەكا دووم درێژ ژبۆ ڤەگەڕیانا بهێز یا تیما مە بۆ هەردو چالاكیێن كوردستانێ و ئیراقێ و بەرنامەكێ رێكخستی دێ هەبیت د ماوەیێ چەند هەیڤێن بهێت دا و دێ پشت گەرمی ب كوڕێن باژێرێ خوە كەین ئەڤەژی ل دووڤ كاودان و شیانێن دارایی یێن دەستێ مە دا هەبن،
ژلایێ خوەڤە خەتاب عومەر راهێنەرێ نوو یێ باسكێت بۆلا گارە گۆت: پێخوەشحالم دوبارە تیمەكا ڤێ یاریێ ببینم و یانەك خوە لێ بكەتە خودان، مە كۆمەكا باش كوڕێن باژێری هەنە و خودان شیانن، سۆپاسییا یانەیا گارە دكەین كو هەڤكاربووینە، پلانەكا باش هاتییە دانان كو بەرنامەكێ راهێنانێ هەبیت پێخەمەت باشترین بەرهەڤی بۆ قارەمان و خولێن داهاتی، هەردەمێ فیدراسیۆنا كوردستانێ چالاكییەك راگەهاند دێ بەرهەڤ بین، دیسان دووڤ پلانا مە بۆ خولا ئیراقێ هەڤڕكیێ د پلا دو بكەین و دەربازبینە پلا ئێك و دووڤدا بۆ پلا ئێك ژی كار بكەین و دەربازبین، یا گرنگ بوومە ڤەگەڕیانا تیمەكا باسكێت بۆلێ یە ل پارێزگەهێ و چاڤدانا كوڕێن باژێرێ دهۆكێ یە، ب هەڤكارییا هەڤالێن خوە رەمەزان یونس و رزگار عوسمان گەشبینن دێ هێزەكا نوو یا ڤێ یاریێ چێكەین و بهێز ڤەگەڕین.
