نوونەرا كوردستانێ پێنگاڤەك مایە بۆ دەستكەفتەكێ نوو
بڕیارە ل شەمبییا بهێت تیما باسكێت بۆلا یانەیا زاخۆ نوونەرا كوردستانێ پێنگاڤا دووماهیێ د خولا پلا نایابا ئیراقێ دا دەربازبوون بۆ قۆناغا پلەی ئۆف پاڤێژیت دەمێ دبیتە مێڤانا یانەیا حللە د یارییەكا ب هێز و چارەنڤیس دا، د هەمان رۆژ دا تیما لاوان ژی دێ یاریێ بەرانبەر تیما لاوێن حللە كەت ئەوا دێ ژ چارچووڤەیێ گەڕا 20 و دووماهییا خولێ ل باژێرێ حللە هێتە كرن.
بەری دەستپێكرنا یارییا ل سەر ئاستێ پێشكەفتیان چاڤەڕێ دهێتە كرن ل سەر ئاستێ لاوان دەمژمێر دو یێ پشتی نیڤرۆ یارییا خوە ئەنجام ب دەن، دووڤدا ل سەر ئاستێ پێشكەفتییان تیما باسكێت بۆلا زاخۆ ل دەمژمێر چارێ ئێڤاری دێ بیتە مێڤانا یانەیا ناڤهاتی د یارییەكا چارەنڤیس دا ژبۆ وەرگرتنا ئێك ژ پلێتێن دەربازبوونێ بۆ قۆناغا پلەی ئۆف، ژبەركو كوڕێن خابووری هەتا نوكە ب كۆمكرنا 27 خالان زێدەباری خالەكا تیما لاوان ل رێزا حەفتێ دهێت ب ئەنجامدانا 18 یارییان دێ بزاڤێ یارییا ئەڤرۆ بگەهیتە ئارمانج ا خوە و دەستكەفتەكێ نوو یێ وەرزێ ئەڤ سالە تۆماربكەت.
ل دوور بەرهەڤیێن تیما زاخۆ جوتیار عەلی هاریكارێ راهێنەرێ دیاركر یارییا حللە دووماهی دەلیڤەیا وانە ژبۆ دەربازبوون بۆ قۆناغا دووماهیێ و پلەی ئۆف و گۆت: ئەم رژدین ب هەمی شیانێن خوە شەڕی بۆ سەركەفتنێ بكەین و دەربازبوونا خوە مسۆگەر بكەین، هەمی یاریزان بەرهەڤن، ب هیڤینە باشترین دەستكەفت بینن.
بۆ زانین دیفاع ئەلجەوی ب34 خالان سەرێ لیستێ دهێت، كەرخ ب33 خالان، نەفت ب32 خال، شورتە ب30 خال، حەشد ئەلشەعبی ب28 خال، دیجلە ئەلجامعە ب28 خالان رێزێن دویێ هەتا شەشێ دهێن، زاخۆ ب27 خالان رێزا حەفتێ، كارەبا ب هەمان خال رێزا هەشتێ دهێت، حللە ب24 خالان، نەفت ئەلشیمال 23خال و غاز ئەلشیمال 23 خالان رێزێن نەهێ هەتا 11ێ دهێن.
