باسكێت بۆلا ئافرەتێن دهۆكێ دەست ب بەرهەڤییان بۆ قارەمانیێن داهاتی كر
قەیس وەیس:
ل شەڤا پێنج شەمبییا بۆری تیما باسكێت بۆلا لاوان و تازەپێگەهشتیێن یانەیا ئافرەتێن دهۆكێ دەست ب ئێكەم یەكەیا خوە یا راهێنانێ ب بەرهەڤبوونا 18 یاریزانان كر خوە بەرهەڤكرن بۆ وەرزێ نوو یێ خولێن كوردستانێ و ئیراقێ.
د داخویانیەكێ دا سەردار سالح سەرۆكێ یانەیا ئافرەتێن دهۆكێ بۆ رۆ ژنامەیا ئەڤرۆ گۆت: پشتی ب سەرفەرازی شیایین ناسناڤێ خولا فوتسالا كوردستانێ ب دەستڤە بینن، هەرزوو ل دووڤ پلانا مەیا دارشتی مە كادرێ راهێنانێ دەستنیشانكرن كو پێكهاتی بوون ژ رەمەزان یونس وەكو راهێنەر، رۆژین عومەر هاریكار و سەعەد جەعفەر هاریكارێ دویێ و بڕیار هاتە دان ژی د شەڤانێن رەمەزانێ دا دەست ب راهێنانێن خوە بكەن ، یەكەم یەكا راهێنانێ ل شەڤا دەربازبوویی ل هۆلا گرتییا چالاكیێن وەرزشی هاتبوو ئەنجامدان خوە بەرهەڤكرن بۆ وەرزێ نوو یێ خول و قارەمانیێن كوردستانێ و ئیراقێ.
هەروەسان ناڤهاتی گۆت: مەرەما مە یا سەرەكی بۆ بەرهەڤیێن تازەپێگەهشتی و لاوان و لەزكرنا راهێنانان، دانانا بنیاتەكێ ئەكادیمی و موكم یێ یاریزانێن كچ بۆ یارییا باسكێت بۆلێ و پشتەڤانییا كچێن باژێرێ خوە یێن خودان شیان و حەز و ڤیانا یاریێ هەیی و ڤەگەڕاندنا هێزا باسكێت بۆلا كچان ل پارێزگەهێ، یا د شیان دا بیت دێ بەردەوامبن ب پشتەڤانییا پارێزگارێ دهۆكێ كو ئەم بشێن بەردەوامیێ ب دەینە پلانا خوە یا پێشئێخستنا ئاستێ وەرزشا كچان و یانەیا ئافرەتێن دهۆكێ.
