د قۆناغا نوو دا ئەرکێ باسكێت بۆلا زاخۆ دیار نینه
عەلی حاجی :
د داخویانیەکێ دا سەرپەرشتێ تیما باسکێت بۆلا یانه‌یا زاخۆ ئەوا پشکدار د خولا نایابا ئیراقێ دا بۆ رۆژنامه‌یا ئەڤرۆ دیار کر هەتا نوکە خشتەیێ ئێکلاکەر بۆ قۆناغا پێش دووماهیێ دا پله‌ی ئۆف دیار نەبوویە و هێشتا چه‌ند یاری ماینە.
زێدەتر عەبدولستار عەلی گۆت: هێشتا چەند یاریەکێن قۆناغا ئێکێ ژ خولا نایابا باسکتبولا ئیراقێ ماینە و نه‌هاتینه كرن، هه‌رده‌مێ ب دووماهی هاتن دێ خشتەیێ رێزبەندیێ دیار بیت و ئەو خشتەیێ نوکە دا هاتیە بەلاڤکرن یێ دووماهیێ نینە دبیت گوهۆڕین د رێزبەندیێ دا دروست بیت پشتی ئەنجامدانا یاریێن مایی ژ قۆناغا ئێکێ لێ ٩٠٪ دێ ئەم یاریا خوە د قۆناغا پێش دوماهیێ دا بەرامبەر نەفت ئەنجامدەین و ئەو چەندە ژی د بەرژەوەندیا مە دا نینە ژبەرکو د هەردو یاریێن خولێ دا نەفت سەرکەڤتن ل سەر تیما مە تومار کریە، لدووف سیستەمێ نوو یێ خولێ ژی ئەو یاری ژی دهێنە هەژمارتن و هەکە نەفت شیا یاریەکێ دا سەرکەڤتنێ ل سەر مە تومار بکەت دێ دەرباز بیت لێ هەکە ئەم کەڤتینە بەرامبەر کەرخ یان ژی حەشدا شەعبی دێ رەوشا مە باشتر بیت ژبەرکو هەر مە سەرکەڤتن ل سەر وان تومار کریە.
ناڤبری گۆت ژی: د قوناغا بهێت دا دێ ئەرکێ مە ب زەحمەت بیت ژبەرکو جەماوەرێ مە ژی یێ سزادایە و ئامادە نابیت د یاریگەهێ دا هەتا دووماهیا خولێ.
