زاخۆ چاڤەڕێی بڕیارا دادگه‌ها كاس یا نێڤده‌وله‌تی یه
عەلی حاجی :
د داخویانیەکێ دا سەرۆکێ یانا زاخۆ یا وەرزشی بۆ رۆژناما ئەڤرۆ دیار کر ئەو چاڤەرێ بریارا ئێکلاکەرا دادگەها کاسن یا نێڤده‌وله‌تی نه و ئێکەتیا ئیراقێ بەرسڤ نەدایە.
زێدەتر عەمار فەرهاد گۆت: سکالا وان ب شێوەیەکێ گەلەک باش هەتا نوکە چەندین قۆناغا دەرباز کرینە بریارە ل پێنج شه‌مبییا بهێت ئێکەم کۆمبوونا دادوەرێن دادگەها کاس دەست پێبکەن، ئەو بەلگەنامەیێن پێدڤی ل دور یارییا زاخۆ بەرامبەر شورتە هەمی ڕادەست کرینە و خەرجیێن وێ دادگەهێ ژی دێ هەمیان دەین ژبەریا ئێکەم رونشتنا وێ دادگەهێ، لێ ب ڕێیا دونامه‌یێن ئه‌لكترۆنی ئێمێلان وێ دادگەهێ داخازا بەلگەیان ژ فیدراسیۆنا تەپا پێی یا ئیراقێ کریە لێ هەتا نوکە وان چو بەرسڤ نەبووینە و بێ دەنگ ماینە لەوما ژی پێدڤیە دەمێ مایی ژبەریا پێنج شه‌مبییا بهێت فیدراسیۆنا ئیراقێ بەرسڤێ بدەت لێ هەکە بەرسڤ نەدا وی دەمی دێ ل سەر فیدراسیۆنا تەپا پێی یا ئیراقێ گران ڕاوەستت، هەمی بەلگەنامەیێن مە ڕادەست کرین وێ یەکێ دیار دکەت کو دێ هەر تشتەک دێ د بەرژەوەندیا مە دا بیت.
ناڤبری گۆت ژی: ئەم ناڕاوەستین هەتا ئەم دگەهینە دووماهی ئەنجام و بریارا دادگەها کاس ژی دێ مافێ دروست یێ هەر یانەیەکێ دەتێ و ئەو دێ ب بریارێن وێ دادگەهێ ژی د رازی بن.
