دهۆك بەرانبەر خودانا سەرێ لیستێ دێ بزاڤێ كەت ئێكەم خوسارەتی بگەهینتێ
بڕیارە ئەڤرۆ هەڤڕكیێن قۆناغا دویێ یا خولا ستێرێن ئیراقێ یا تەپا پێی ب ئەنجامدانا چار یارییان بهێنە كرن پشتی بۆ نێزیكی سێ حەفتییان هاتییە راوەستاندن ژ بەر پشكدارییا هەلبژارتیێ ئیراقێ د ڤاڤارتنێن ئاسیا و مۆندیالا جیهانی دا، یارییا دهۆك و جەوییە دبیتە كۆپیتكا گەڕا 20ێ یێن ڤێ حەفتیێ و سێ شەمبییا بهێت زاخۆ دێ بزاڤێ كەت ب سەركەفتن ژ باشۆرێ ئیراقێ ڤەگەڕیت.
ئەلهۆیێن چیا دێ بزاڤێ كەت ئێكەم خوسارەتی بگەهینە جەوییە
چاڤەڕێ دهێتە كرن ئەڤرۆ دەمژمێر 9:30 شەڤ جەماوەرێ وەرزشی یێ یانەیا دهۆكێ ل یاریگەهێ ئامادەبن كو دبیتە شەڤانێن رەمەزانێ ب ژڤان بۆ پشتەڤانیا تیما خوە بەرانبەر یانەیا جەوییە ئێك ژ ب هێزترین یاریێن دهۆكێ د خولێ دا و یا ئاگرینە، ئەلهۆیێن چیا د نوكە دا ل رێزا شەشێ دهێت ب 29 خالان ژ هەشت سەركەفتن، پێنج وەكهەڤی و شەش خوسارەتییان یاریزانێن وێ 16 گۆل تۆماركرینە لێ 15 گۆل ل سەر هاتینە تۆماركرن، د بەرانبەر دا تیما جەوییە سەرێ لیستا خولێ دهێت ب45 خالان ژ13 سەركەفتنا و شەش وەكهەڤییان و چو خوسارەتی نە داینە، دهۆك دێ بزاڤێ كەت د ئەڤ شەڤە دا خوسارەتییا ئێكێ ب گەهینتێ و سەركەفتنێن وێ ب راوەستینیت و هەروەسان تۆلێن یارییا قۆناغا ئێكێ ڤەكەت ئەوا ب گۆلەكێ تووشی خوسارەتیێ بوویی ل یاریگەها وێ.
ل دور دووماهی بەرهەڤیێن ئەلهۆیێن چیا د داخویانیەكێ دا زیاد ئەحمەد هێرشبەرێ تیما دهۆكێ گەشبینییا خوە دیاركر كو دێ شێن ئێكەم خوسارەتی گەهینە خودانا سەرێ لیستێ و گۆت: یارییەكا ب سانەهی نابیت بەرانبەر ئێك ژ ب هێزترین تیمێن د خولێ دا و كو د ماوەیێ قۆناغا ئێكێ دا چو یانەیان نەشیایە سەركەفتنێ ل سەر بینت، ئەڤ یارییە بۆ مە گەلەك یا گرنگە و پشت گەرمییا جەماوەرێ خوە و ئەم رژدین سەركەفتنەكا ژ ژهەژی بینین، بۆ ڤێ یاریێ یا دشیان دا بیت دێ شەڕی كەین هەتا دووماهی خولەك و فیركا دادڤانی، هەموو یاریزان ب ئێك ئارمانج و ل دووڤ پلانێن كادرێ راهێنانێ ئەم دێ بۆ سێ خالان جەنگین.
ئامار د بەرژوەندییا مێڤانان دایە
ل دووڤ ئامارێن هەردو یانەیان كو 29 جاران د خولێ دا بەرانبەری ئێك بووبنە، ئەلهۆیێن چیا ب تنێ شەش سەركەفتن ئینایە و 13 خوسارەتی هەبووینە بەرانبەر 10 وەكهەڤییان، لێ هژمارەیا گۆلێن جەوییە زێدەتر بووینە كو دگەهیتە 46 گۆلان و دهۆكێ 15 گۆل ل سەر جەوییە تۆماركرینە، دەنگۆباسێن هاتینە بەلاڤكرن هەر ئێك ژ محەمەد مەعەن و سیابەند عەگید بۆ یارییا ئەڤ شەڤە د بەرهەڤگ نابن.
نەورۆز ب هیڤییە سەركەفتن ژ كەربلا ڤەگەڕیت
ژلایێ خوەڤە تیما یانەیا نەورۆز د هەمان ژڤان دا دێ بیتە مێڤانا یانەیا كەربەلا د تاقیكرنەكا ب هێز دا بۆ كورێن باژێرێ سلێمانیێ ئەوا ب27 خالان رێزا حەفتێ دهێت و خودانێن ئەردی ب 19 خالان رێزا 15ێ دهێت، راهێنەرێ نەورۆز وەلی كەریم دێ پشت گەرمییا ستێرێن خوە كەت ژ وانا پیشەكار كلاودیۆ ئۆلیڤێرا و محەمەد سامی، باكۆ عومەر و ئیفانی ئیفانی و محەمەد دلاوەر.
سوبەهی هەولێر مێڤانا نەجەفە
ژ یاریێن دی یێن ئەڤرۆ، زەورا دێ مێڤاندارییا مەجەف كەت، نەفت میسان دێ بیتە مێڤانا ئەمانەت بەغدا، یاریێن سوبەهی بڕیارە ل دەمژمێر 9:30 شەڤ یانەیا هەولێر ل یاریگەها نەجەف دێ بیتە مێڤانا یانەیا نەفت ئەلبەسرا د یارییەكا ب سانەهی نابیت بۆ كوڕێن كەلهە و منارە، هەروەسان نەفت دێ مێڤاندارییا كارەبا كەت، حدود دێ بیتە مێڤانا شورتە، ل سێ شەمبییا بهێت دەمژمێر 9:30 شەڤ تیما یانەیا زاخۆ دێ ل یاریگەها كەربەلا بیتە مێڤانا یانەیا ئەلقاسم ب هیڤی و ئارمانجێن سەركەفتنێ و بەردەوامییا پاراستنا رێزبەندییا خوە، هەروەسان تەلبە و كەرخ ل پایتەختێ ئیراقێ بەغدا دێ بەرانبەر ئێك جەنگن.
هەلوەستێ گشتی یێ رێزبەندیێ بڤی شێوەیە:
1- جەوییە 45 خال
2- شورتە 42 خال
3- زاخۆ 32 خال
4- زەورا 30 خال
5- تەلەبە 30 خال
6- دهۆك 29 خال
7- حدود 29 خال
8- نەورۆز 27 خال
9- نەفت 27 خال
10- نەفت میسان 26 خال
11- نەجەف 26 خال
12- كارەبا 23 خال
13- مینا 23 خال
14- هەولێر 21 خال
15- كەربەلا 19 خال
16- نەفت ئەلبەسرا 18 خال
17- كەرخ 17 خال
18- ئەمانەت بەغدا 13 خال
19- ئالقاسم 12 خال
20- نەفت ئەلوەسەت 9 خال
