مللەت جەمال: ئێكەم جارە ل سەر ئاستێ جیهانێ پلێت بهێنە فرۆتن و جەماوەر بەرهەڤ نەبیت
شاهۆ فەرید:
د داخویانیەكێ دا مللەت جەمال ئەندامێ كارگێرییا یانەیا دهۆك دیاركر رێژەیا زێدەتری هەشتێ ژ سەدێ ژ پلێتێن یاریا تیما مە یا فوتبۆلێ بەرانبەر كەرخ هاتینە فروتن و ئەڤ پروسێسە دێ یا بەردەوام بیت هەتا رۆژا یاریێ، ئەوا بڕیارە سوبەهی ژ چارچووڤەیێ گەڕا 22ێ یا خولا ستێرێن ئیراقێ ل یاریگەها دهۆكێ بهێتە ئەنجامدان.
هەروەسان ناڤهاتی بۆ رۆژنامەیا ئەڤرۆ گۆت: دەرئەنجامێ ئەوان سزایێن فیدراسیۆنا فوتبۆلا ئیراقێ ل سەر یانەیا مە كو دو یاری بێ جەماوەربن، لێ دلسۆزیا ئەڤی جەماوەری دیاربو كو وەكو پشتەڤانی بۆ یانەیا خوە دەست ب كرینا پلێتان كرن بێ دناڤا یاریگەهێ دا ئامادەبن و ئەڤچەندە دهێتە هژمارتن بۆ ئێكەم جارە نە بتنێ ل سەر ئاستێ كوردستانێ و ئیراقێ بەلكو ل سەر ئاستێ جیهانێ ژی پلێتێن یاریێ بهێنە فرۆتن بێ جەماوەر بەرهەڤ بیت، ئەڤەژی جهێ دەستخوەشیێ یە و شازانیێ یە مە جەماوەرەكێ ب وەفادار یێ هەی.
ژلایەكێ دیڤە مللەت جەمال گۆت: هژمارەكا نوو یا پیڤایی بۆ یانەیا دهۆك هاتە هژمارتن كو بزنسمانەكی ئێك پلێتا ڤی ئای پی ب كوژمێ 10 ملیون دیناران كری، هەروەسان چەندین تەخێن جڤاكی ژ بەرپرس و كەسانێن بەرنیاس، راگەهاندكار، قوتابی و خەلكێ گشتی هەروەسا ژ پاریزگەهێن دی ژی پشكداری ئەڤێ هەوێ بووینە، ئەم دلخوەشین بڤێ هەوا جەماوەری كری و دیاردبیت ئەم ئێك خێزانین و بارێ مە گرانتر لێكر بۆ خزمەتكرنا وان، هێشتا داتایێن دووماهیێ یێ سەرجەمێ كۆژمێ پارەی نە هاتیە دیاركرن و بەری یاریا ل گەل كەرخ دێ هەمی داتایا بۆ جەماوەری دیاركەین، ئەڤە بارسڤیەكا باش بۆ جەماوەری بەرامبەری یانێ كری لێ دخوازین داهاتی دا بارێ ئابوریێ یانێ باشبیتن و ئەڤ بارگرانیە بۆ جەماوەری نەبیتن.
