ئەڤرۆ زاخۆ مێڤانا نەورۆزە د كلاسیكۆیا ئاگرین دا
چاڤەڕێ دهێتە كرن ئەڤرۆ سێ یاری ژ هەڤڕكیێن گەڕا 22ێ یا خولا ستێرێن ئیراقێ یا تەپا پێی بهێنە ئەنجامدان پشتی بۆ ماوەیێ حەفتیەكێ هاتیە راوەستاندن ژبەر ئەنجامدانا كۆپا ئیراقێ، هەردو یاریێن هەولێر دگەل كارەبا و تەلەبە دگەل كەربەلا هاتنە پاشئێخستن.
بڕیارە ل دەمژمێر سێ ئێڤاری تیما یانەیا زاخۆ ل یاریگەها سلێمانیێ ببیتە مێڤانا یانەیا نەورۆز د دیاریەكا ئاگرین دا كو د ڤێ گەڕێ دا دهێتە هژمارتن ئێك ژ كلاسیكۆیێن كوردستانی یێن ب هێز و دهێتە پێشبینیكرن جەماوەرەكێ باش یێ زاخۆ ل یاریگەهێ ئامادە بیت ژبۆ پشتەڤانییا تیما خوە، كوڕێن خابووری د رێزبەندیەكا باش دانە كو ب 34 خالان رێزا سێیێ دهێت ژ هەشت سەركەفتن و 10 وەكهەڤییان، د بەرانبەر دا خودانێن ئەردی 33 خال هەنە رێزا شەشێ دهێت، د دیدارێن د ناڤبەرا هەردو تیمان دا پێنج یاری هەبووینە و چو وەكهەڤی نە هاتینە تۆماركرن ب دو سەركەفتن بۆ زاخۆ و سێ بۆ نەورۆز بووینە.
حەمید ئیسماعیل سەرپەرشتێ تیما زاخۆ دیار كر ئەو رژدن بەردەوامبیێ ب دەنە ئاست و ئەنجامێن خوە و گۆت: سەرباری یارییا ئەڤرۆ ب سانەهی نابیت لێ ئەم بەرهەڤین و هەمی یاریزان رژدن ژبۆ دەستڤە ئینانا ئەنجامەكێ باش، یاریێن كلاسیكۆ و دێربی هەردەم ب هێزن و جەماوەر خوەشیێ ژێ دبینت، ئەم یێ ل رێزا سێیێ لەوما دێ هەمی بزاڤان كەین پارێزین و یا د شیان دا بیت دێ كار كەین كو بۆ هەر یاریەكێ یاریزان بەرهەڤبن و ئارمانجا سەركەفتنان هەبیت.
ژ یاریێن دی یێن ئەڤرۆ، شورتە- مینا دەمژمێر 5:30 مەغرەب، ئەمانەت بەغدا- زەورا دەمژمێر هەشتی شەڤ، هەلوەستێ گشتی یێ رێزبەندیێ بڤی شێوەیە.
1- شورتە 48 خال.
2- جەوییە 48 خال.
3- زاخۆ 34 خال.
4- زەورا 34 خال.
5- دهۆك 33 خال.
6- نەورۆز 33 خال.
7- تەلەبە 31 خال.
8- نەجەف 30 خال.
9- نەفت 30 خال.
10- حدود 29 خال.
11- نەفت میسان 27 خال.
12- كارەبا 26 خال.
13- مینا 26 خال.
14- هەولێر 23 خال.
15- كەربەلا 22 خال.
16- كەرخ 22 خال.
17- نەفت ئەلبەسرا 21 خال.
18- ئەلقاسم 16 خال.
19- ئەمانەت بەغدا 14 خال.
20- نەفت ئەلوەسەت 10 خال.