سه‌ردار ئیسماعیل: رێزلێئینانا وه‌رزشڤانێن دێرین دێ به‌رده‌وامبیت
قەیس وەیس:
رێڤه‌به‌رییا گشتی یا وه‌رزشی ل هه‌رێما كوردستانێ ب هه‌ڤكاری دگه‌ل رێڤه‌به‌ریا وه‌رزشی یا پارێزگه‌ها دهۆكێ ب فه‌رمی 12 یاریزانێن دێرین و قاره‌مان خه‌لاتكرن، د رێوره‌سمه‌كی دا ئه‌وا ل حه‌فتییا بۆری ل هۆلا سمێناران یا كۆلیژه‌یا په‌روه‌رده‌یا جه‌سته‌یی و زانستیێن وه‌رزشی ل زانكویا دهۆك هاتییه ئه‌نجامدان.
ئه‌و یاریزانێن هاتینه خه‌لاتكرن هه‌ر ئێك ژ مسته‌فا سه‌عید یاریزانێ یاریا پایسكلان، نه‌سیب عه‌بدوللا یاریزانێ یارییا ته‌پا پێی، جه‌عفه‌ر جه‌لاله‌دین یاریا شه‌تره‌نجێ، نه‌جمه‌ددین سلێمان یاریزانێ ته‌پا ده‌ستی، سوبحی كامل دادڤانێ دێرین یێ یارییا ته‌پا پێی، وه‌یسی نه‌بی یارییا باسكێت بۆلێ، یاسر عه‌بدوللا یاریزانێ بلیاردێ، ئه‌حمه‌د موسا یاریزان، راهێنه‌ر و دادڤانێ یارییا تێنسا ل سه‌ر مێزێ، شێركۆ عه‌لی یاریزانێ یارییا له‌شجوانیێ، ماهینو عه‌بدوللا یاریزانا یارییا ڤۆلی بۆلێ، هه‌روه‌سان عه‌بدوللا ئه‌سعه‌د یێ ناڤدار عه‌بدی كوچه‌ر و ئه‌حمه‌د فه‌وزی هه‌ردو یاریزانێن دێرین و قاره‌مان یێن یارییا له‌شجوانیێ.
د رێوره‌سمێن خه‌لاتكرنێ دا راپۆرته‌كا ڤیدیۆیی و نڤێسیێ ل سه‌ر ژیانناما ئه‌وان وه‌رزشڤانان هاته نیشاندا و پاشان خه‌لات ل سه‌ر وان هاته به‌لاڤكرن ئه‌وا به‌رپرسێن وه‌رزشی و حكومی و حزبی و چه‌ند وه‌رزشڤانێن دی ئاماده‌بووین.
ل دور ڤێ خه‌لاتكرنێ سه‌ردار ئیسماعیل رێڤه‌به‌رێ گشتی یێ وه‌رزشی دیاركر ئه‌ڤ رێزلئێنانا ل دیڤ به‌رنامه‌كێ رێكخستی یێ وه‌زاره‌تا ره‌وشه‌نبیری ولاوان و پشته‌ڤانییا حوكمه‌تا هه‌رێما كوردستانێ بۆ هه‌موو وه‌رزشڤانێن دێرین و قاره‌مانێن وه‌رزشی ل كوردستانێ هاتییه دانان و گۆت: ئه‌ڤ پرۆسێسه ل هه‌ردو پارێزگه‌هێن هه‌ولێرا پایته‌خت و سلێمانیێ ژی هاتبوونه رێكخستن و دێ به‌رده‌وامبیت وه‌كو به‌رنامه كو هه‌می وه‌رزشڤانێن مه بهێنه خه‌لاتكرن وه‌كو رێگرتن بۆ خزمه‌تا وان یا چه‌ندین سالان، سۆپاسییا رێڤه‌به‌ریا وه‌رزشی ل پارێزگه‌ها دهۆكێ دكه‌م كو جوانترین شێوه مه‌راسیمه رێكخستیه.