ئەڤرۆ كلاسیكۆیا جیهانێ دێ ئاگرین بیت
بڕیارە ئەڤرۆ ل دەمژمێر 10 شەڤ جەماوەرێ وەرزشی ل گشتی جیهانێ چاڤەڕێ یاریا ئاگرین و كلاسیكۆیا مەزن بن دناڤبەرا یانەیا ریال مەدرید و بەرشەلۆنا ژ چارچووڤەیێ هەڤڕكیێن گەڕا 32 یا خولا ئسپانیا ئەوا دێ ل یاریگەها سانتیاگۆ بیرنابیۆ ل مەدرید هێتە كرن كو دبیتە كلاسیكۆیا سێیێ یا وەرزێ ئەڤ سالە.
یانەیا ریال مەدرید ئەوا نوكە سەرێ لیستا خولێ دهێت ب 78 خالان ب جووداهییا هەشت خالان ژ بەرشەلۆنا هەوا ب70 خالان رێزا دویێ دهێت، یارییا ئەڤ شەڤە تایبەتمەندا خوە بۆ هەردو زلهێزا هەیە، سەركەفتنا ریالێ دێ جووداهیێ كەتە 11 خال و دووركەفتنەكا بەرچاڤ بیت، لێ سەركەفتنا بەرشەلۆنا دێ شەڕی ناسناڤی ئاگرین كەت و بتنێ پێنج خالان هێلیتە دناڤبەرا ئێك دا، هەرچەندە د دووماهی سێ یاریێن بوری دا ریال شیایە بەرشەلۆنا، ل نیسانا 2023ێ دچارێك دووماهییا كۆپا شاهێ ئیسپانیا دا ریالێ ب چار گۆلان بێ بەرانبەر سەركەفتن ئینابوو، هەروەسان دگەل دەستپێكرنا خولا وەرزێ ئەڤ سالە ریال ب2-1 سەركەفتن ئینابوو، دیسان د دووماهییا سۆپەرا ئسپانیا دا ریالێ سەركەفتن ئینابوو ب4-1، ب گشتی د خولا ئسپانیا دا 187 جاران بەرانبەر ئێك بووینە، 78 بۆ ریالێ و 74 جاران بۆ بەرشەلۆنا و 35 یاریان وەكهەڤ بووینە، د كۆپا شاهێ ئیسپانیا دا 37 یاری ئەنجامداینە 16 سەركەفتنێن بەرشەلۆنا، 13 یێن ریالێ و هەشت وەكهەڤی هاتینە، د كۆپا سۆپەرا ئیسپانیا دا 17 جاران بوویە، 10 بۆ ریالێ و پێنج بۆ بەرشەلۆنا و دو وەكهەڤی هاتینە، د چامپیۆنزێ دا هەشت یاری هاتینە كرن، سێ بۆ ریالێ و دو بۆ بەرشەلۆنا و سێ وەكهەڤی هاتینە.