زاخۆ دێ مفایی ژ پاشئێخستنا یاریا خوە وه‌رگریت
عەلی حاجی:
د داخویانیەکێ دا ئەندامێ کارگێریا یانه‌یا زاخۆ بۆ رۆژنامه‌یا ئەڤرۆ دیار کر پاشئێخستنا یاریا وان بەرامبەر یانه‌یا جەویە باشی و خرابی هەنە لێ دڤێت ڤێ دەلیڤەیێ باشتر ببینن.
زێدەتر دلژار عەدنان گۆت: پاشئێخستنا یاریا مە بەرامبەر جەویە ئه‌وا بڕیاربوو ئه‌ڤرۆ ژ چارچووڤێ گه‌ڕا23ێ یا خولا ستێرێن ئیراقێ یا فوتبۆلێ هاتباركرن باشی و خرابیێن خوە هه‌نە، تیما مە یا د رەوشەکا باش دا ب تایبەتی پشتی ژ دەرڤەیی یاریگەها خوە سەرکەڤتن ل سەر نەورۆز ئینایی و یا به‌رهه‌ڤبوو به‌رانبه‌ر جویە، دیاره‌ژی ئەنجامێن تیما جەویە د باش نەبوون و ئەم د رەوشەکا باشتر دا بووین و دەلیڤەیەکا گرنگ بوو بشێن سەرکەڤتنێ بینن، ژلایەکێ دیڤە د بەرژەوەندیا مە دا بوو ژبه‌ركوهەر ئێک ژ ئەحمەد ئیبراهیم و کابویی ژ ئەگەرێن جودا دبه‌رهه‌ڤنه‌بوون، هه‌روه‌سان بۆ جاما کوردستانێ چه‌ند یاریزانێن تیمێ بۆ یا كوردستانێ به‌رانبه‌ر یانه‌یا ئاکرێ هنارتینه، لێ هەکە یاریا دگه‌ل جەویە ئەنجامدابا مە نەدشیا ڤێ پێنگاڤێ پاڤێژین و ئارمانجا مە د جاما کوردستانێ دا ناسناڤە.
ژلایه‌كێ دیڤه ناڤهاتی گۆت: خالەکا دناڤبەرا مه و هاریکارێ راهێنەرێ تیما مه محه‌مه‌د ئه‌لسائید ئەو بوویه هەر دەما نزار مەحروسی ڕاهێنەراتییا یانەیەکێ وەربگرت دێ یانه‌یا زاخۆ رێکێ ب وی دەت و وی ب خوە ژی داخازا چوونێ کریه و دێ رێکێ پێ بدەین بچیت، د نوکە دا ئەم یێ پێگوهورێ وی دگەرین داکو وێ ڤالاهیێ تژی بکەین، ئەم ل سەر رێیەکا دروست د خولا ئیراقێ دا دچین و دێ بەردەوام بین ل سەر پشتەڤانیکرنا تیما خوە هەتا کو بشێن رێزێن پێشیێ پارێزین.