د خولەكا كوژەك دا ئاكرێ دەربازبوو دووماهییا كۆپا كوردستانێ
تیما فوتبۆلا یانەیا ئاكرێ قارەمانا وەرزێ ئەڤ سالە یا خولا پلا نایابا كوردستانێ دەربازبوو یارییا دووماهییا كۆپا كورستانێ پشتی شیایی د خولەكا كوژەك دا سەركەفتنەكا گرنگ ل سەر مێڤانا خوە یانەیا زاخۆ ب سێ گۆلان بەرانبەر دو گۆلان، د یارییا واندا ئەوا دوهی ژ چارچووڤەیێ هەڤڕكیێن قۆناغا پێش دووماهییا كۆپا كوردستانێ ل یاریگەها ئاكرێ هاتیە ئەنجامدان.
د نیڤا ئێكێ ئەنجام ب پێشكەفتنا تیما ئاكرێ ب دووماهی هاتبوو ب گۆلەكێ بێ بەرانبەر ئەوا ژلایێ هێرشبەرێ وێ ب لێدانا پەنەلتیێ د خولەكا 21ێ دا تۆماركر، د نیڤا دویێ دا یاریزانێن زاخۆ گڤاشتنەكا مەزن ل سەر گۆلا ئاكرێ كر لێ دهێرشەكا هەڤدژ دا هێرشبەرێ پیشەكار یێ یانەیا ئاكرێ ئیسحاق میساهـ گۆلا دویێ بۆ تیما خوە ئینا د خولەكا 56ێ ب لێدانا پەنەلتیێ دا، لێ پشتی بۆرینا دو خولەكان و دەرئەنجامێ گڤاشتنێن بەردەوام دادڤانێ یاریێ پەنەلتیەك بۆ تیما زاخۆ هەژمارت ئەوا ب سەركەفتیانە یاریزانێ زاخۆ یونس عەبد د خولەكا 56ێ دا ئینایی، تیما مێڤان بەردەوامبوو ل سەر گڤاشتنێن خوە و شیا چەندین جاران مەترسیێ ل سەر گۆلا ئاكرێ بكەت تا ب گەهیتە خولەكا 82ێ كاپتنێ تیما زاخۆ حەمید حاجی شیا گۆلا دویێ و وەكهەڤیێ بینت، د خولەكێن مایی دا سەرباری یاریزانێن زاخۆ بەردەوامی دا گڤاشتنان بێ ئەنجام بوو، دادڤانێ یاریێ چار خولەك وەكو دەمێ زێدەكری دیاركرن، هەمی جەماوەرێ بەرهەڤبوویی هوسا هزر دكر دێ یاری بەر ب پەنەلتیان چی تلێ پیشەكارێ ئاكرێ ئیسحاق میساهـ بۆچوونەكا دی هەبوو پشتی د خولەكا 90+3 ب سەری شیایی گۆلا سێیێ و سەركەفتنێ و دەربازبوون بۆ یارییا دووماهیێ بینت.
ژلایێ خوەڤە تیما یانەیا هندرین ب دو گۆلان بەرانبەر گۆلەكێ سەركەفتن ل سەر تیما سەید سادق ئینا دگەل یانەیا ئاكرێ دەربازبوو یارییا دووماهیێ، ئەو بڕیارە ئەڤ یارییە ل یاریگەها زاخۆ یا نێڤدەولەتی بهێتە ئەنجامدان پشتی فیدراسیۆنا فوتبۆلا كوردستانێ جهێ وێ دەستنیشانكری، بۆ زانین هەتا نوكە ئیسحاق مینساهـ ل سەر لیستا گۆلكەرێن كۆپا كوردستانێ دهێت ب تۆماركرنا چار گۆلان، یونس عەبد ژ زاخۆ ب سێ گۆلان رێزا دویێ.
ل دۆر ڤێ سەركەفتنێ هوزەڤان زاهد سەرپەرشتێ تیما ئاكرێ بۆ رۆژنامەیا ئەڤرۆ گۆت: پیرۆزباهیێ ل هەمی خەلكێ ئاكرێ دكەم كو گەهشتینە یارییا دووماهییا كۆپا كوردستانێ و ئەڤە هەر ژ دەستپێكا وەرزێ ئەڤ سالە پلانا مە بوویە و ئەم نا راوەستیێن هەتا بگەهینە دەستكەفتێ دویێ یێ وەرزێ ئەڤ سالە پشتی ناسناڤێ خولا پلا نایاب، سۆپاسییا بەرپرسێن دەڤەرا ئاكرێ دكەین و جەماوەرێ دلسۆز كو هەردەم پشتەڤان بووینە بۆ یانەیا خوە.