ئه‌كادیمیێن وه‌رزشی ل پارێزگه‌هێ دێ هێنه ستانده‌ركرن
قەیس وەیس:
رێڤه‌به‌ریا وه‌رزش ل پارێزگه‌ها دهۆكێ رێنمایێن وه‌رزێ نوو ژبۆ ڤه‌كرن و ده‌ستیردانا سالانه یا ئه‌كادیمیێن وه‌رزشی بۆ وه‌رزێ هاڤینێ داناینه كو ژ 18 خالان پێكدهێت و نابیت ئه‌كادیمی بێ مۆله‌ت ژ یانه‌یه‌كا وه‌رزشی بهێته ڤه‌كرن.
د داخویانیه‌كێ دا جه‌مال سلێمان رێڤه‌به‌رێ وه‌رزشی ل پارێزگه‌ها دهۆكێ بۆ رۆژنامه‌یا ئه‌ڤرۆ گۆت: وه‌رزێ ئه‌ڤ ل دووڤ رێنمایێن رێڤه‌به‌ریا گشتی یا وه‌رزشی ل هه‌رێما كوردستانێ دێ ستانده‌ركرنا ئه‌كادیمی هێته كرن كو دڤێت هه‌ر ئه‌كادیمیه‌كا بهێته ڤه‌كرن ب نڤێسارا فه‌رمی دێ ره‌وانه‌یی لژنه‌یا ئۆلمپی تایێ دهۆكێ كه‌ت ژبۆ دیاركرنا ئه‌وان یاریێن پێدڤی بۆ ڤه‌كرنێ پێخه‌مه‌ت ئه‌و فیدراسیۆنێن سه‌ر ب لژنه‌یا ئۆلمپی دۆڤچوونا سیڤیێ راهێنه‌رێن وان بكه‌ن دووڤدا دێ بنڤێساره‌كا دی بۆ مه هێته هنارتن و ئه‌م ژی دێ دووڤچوونا هنده‌ك لایه‌نێن دی كه‌ین به‌ر بهێته هنارتن بۆ رێڤه‌به‌رییا گشتی یا وه‌رزشی ل هه‌رێمێ پێخه‌مه‌ت وه‌رگرتنا ده‌ستیردانا كاركرنێ كو ئه‌ڤ پرۆسێسه هه‌تا 15ێ ڤێ هه‌یڤێ به‌رده‌وام بیت.
ژلایه‌كێ دیڤه ناڤهاتی گۆت: بۆ هه‌ر ئه‌كادیمیه‌كێ مه 18 خالێن هه‌ین وه‌كو رێنموما پێدڤییه پێگیریێ پێ بكه‌ت و هه‌می خال ژی پێخه‌مه‌ت رێكخستنا كاری یه ز بۆ پێشكه‌فتنا ئاستێ وه‌رزشا ئه‌كادیمیان و پووته‌دان ب یاریزانێن كچ و كور یێن ژیێن جودا كو ژ شه‌ش سالی هه‌تا 17 سالی بن و یاگرنگ ژی ستاڤێ ئه‌كادیمیێ خودان باوه‌رنامه‌یێن وه‌رزشی بن و راهێنه‌ر ژی خودان باوه‌رنامه‌یێن ئاسیایی بن، ب هیڤییا وێ یه‌كێ نه ئه‌ڤ ساله ب شێوه‌كێ باشتر و رێكخستی تر بیت بۆ هندێ ب گه‌هینه ئارمانجا خوه ئه‌و ژی پێشئێخستنا ئاستێ وه‌رزشا پارێزگه‌ها دهۆكێ یه بۆ پرانییا یارییان.