نابیت دهۆك و زاخۆ هەڤڕكێن خوە ب سڤكاتی وەربگرن
چاڤەڕێ یە ئەڤرۆ پێنج یاری ژ چارچووڤەیێ هەڤڕكیێن گەڕا 28ێ یا خولا ستێرێن ئیراقێ یا فوتبۆلێ بهێنە كرن و هەردو یانەیێن پارێزگەهێ و نوونەرێن بەهدینان دهۆك، زاخۆ د ئەركەكێن ب زەحمەت دانە و داخوازكرینە جەماوەرێ خوە كەیفخوەش بكەن پشتی د یاریێن بۆری دا ب ەكهەڤی ب دووماهی هاتین .
دهۆك و نەورۆز دێربیەكێ جودا و شەڕێ رێزبەندیێ
بڕیارە ل دەمژمێر 10ی شەڤ تیما یانەیا دهۆك ل یاریگەها خوە مێڤاندارییا یانەیا نەورۆز بكەت د دێربەیكێ جودا یێ كوردستانی دا و شەڕەكێ جودا بۆ رێزبەندیێ، ئەلهۆیێن چیا ئەوێن د نوكە دا 41 خال هەین رێزا شەشێ دهێت ژ 10 سەركەفتن و 11 وەكهەڤییان ب هەمان خالان لێ ژبەر سەركەفتنا گەڕا بۆری یا تیما دهۆكێ ل سەر نەورۆزێ ب گۆلەكێ شیاییە پێشڤە بیت ژ تیما باژێرێ سلێمانیێ ئەوا 41 خال كۆمكرین 11 سەركەفتن و هەشت وەكهەڤی هەنە، یارییا ئەڤرۆ یا جودایە و شەڕەكێ مەزن بیت بۆ رێزبەندیا شەشێ بیت د بەرانبەردا ئەو تیما خوسارەت دوور نینە بچیتە رێزا هەشتێ ژی، لەوما یاریەكا ب سانەهی نابیت بۆ هەردو تیمان، هەرچەندە ئەلهۆیێن چیا دێ پشتگەرمیا پشتەڤانێن خوە شەڕی بۆ سەركەفتنێ كەن و پاراستنا رێزا خوە كەن.
ژبلی سەركەفتنێ چ بژاردەیێن دی نینن
تیما یانەیا زاخۆ ئەوا ئاست و ئەنجامێن باش پێشكێش دكەت شیایە ل رێزێن پێشیێ بمینت دێ ل یاریگەها خوە دەمژمێر 3:45 ئێڤاری مێڤاندارییا یانەیا كەرخ یا بەغدایی كەت، كوڕێن خابووری ب 47 خالان رێزا چارێ دهێت ژ 12 سەركەفتن و 11 وەكهەڤییان، یارییا گەڕا بۆری دگەل ئەمانەت بەغدا بوو جهێ نەرازیبوونا پشتەڤانێن وێ ژبەر وەكهەڤییەكا نە چاڤەڕێ كرن پشتی چار سەركەفتنێن ل دووڤ ئێك، لێ دوور نینە بۆ یارییا ئەڤرۆ كوڕێن خابووری جەماوەرێ خوە ئاشت بكەت و رێزبەندیا خوە پارێزیت و سەركەفتنا قۆناغا بۆری دۆبارەبكەت.
شرۆڤەكارێ وەرزشی بۆچوونا خوە دیار كر
لدۆر یاریێن هەردو تیما وەحید رەشید شرۆڤەكارێ وەرزشی بۆ رۆژنامەیا ئەڤرۆ گۆت: هەردو یانەیێن پارێزگەهێ پێدڤی ب سەركەفتنێ نە پشتی د یاریێن بوری دا تووشی وەكهەڤیان بووین و دڤێت مفایی ژ ئەرد و پشتەڤانێن خوە وەربگرن و نابیت هەڤڕكێن خوە ب سڤكاتی وەربگرن و هیڤییا مە ژی ئەوە هەردو یانەیێن پارێزگەهێ ب سەركەڤن.
سەبارەت یارییا دهۆك و نەورۆز یا ب سانەهی نابیت بۆ ئەلهۆیێن چیا تایبەت هەكە دۆڤچوونا ئاست و ئەنجامێن نەورۆز بكەین كو یارییەكا مۆدرین و ب پلان و شێوازەكێ رێكخستی دكەن بەرۆڤاژی تیما دهۆكێ ئەوا هەتا نوكە چو پلانێن دیار نینن و پشتگەرمییا خوە ب تەپێن درێژ دكەن و هەكە ل دووڤ شیانێن كەسۆكی یێن یاریزانێن هێلا پێشیێ وەكو هێران، زاكێری و عیماد و هارونی هندەك جاران مەترسیێ پەیدا بكەن، ئاریشەیا وێ د چارێكا دووماهیێ یا یاریێ دا گەلەك جاران تووشی خەلەتیان بووینە و دهێتە دیتن كو چو پلا نینن كونترۆلا سەركەفتنا خوە ژی بكەن، لەوما دبینم بۆ یارییا ئەڤرۆ دڤێت هەمی بزاڤا بكەت تایبەت راهێنەر خواندنا ئاستێ نەورۆزێ كربیت تایبەت خالێن هێزێ و كێماسیان پێخەمەت نەهێلێن چو خالێن دی ژ دەست بدەت.
ل سەر یارییا زاخۆ و كەرخ ناڤهاتی گۆت: هەرچەندە یانەیا كەرخ تیمەكا ل رێزێن بن ناڤینێ دا لێ یا ب سانەهی نابیت بۆ كوڕێن خابووری ژبەركو ئەو ژی یا هەمی بزاڤان دكەت خوە ژ رێزێن دووماهیێ پارێزیت و مەترسیا داكەفتنێ دا دووربكەت، د بەرانبەر دا ئاست و ئەنجامێن زاخۆ گەلەك د باشن ژبلی وەكهەڤییا ڤێ دووماهیێ، ئەڤە ژی بۆ وێ چەندێ ڤەدگەڕیت كو گۆلپارێز و هێلا بەرەڤانیێ ب هێزن دیسان ئەو لێكتێگەهشتنا دناڤبەرا گشت یاریزانان تایبەت هێلا ناڤین و هێرشبەریێ بوویە ئەگەر بگەهنە رێزێن پێشیێ، لەوما ل سەر راهێنەرێ وێ تەلال ئەلبۆشی نە هێلیت چو فشار ل سەر یاریزانان هەبیت و مفایی ژ ئەرد و پشتەڤانێن خوە وەربگریت، دبیت زەحمەتەكا مەزن بینت هەتا ب گەهیتە گۆلا كەرخێ لێ دێ مینت زاخۆ شەڕێ سێ خالان كەت
ژ یاریێن دی یێن ئەڤرۆ، شورتە- كەرخ، نەفت میسان- حدود، نەفت ئەلبەسرا- كەربلا، سوبەهی جەوییە- نەجەف، تەلەبە- زەورا.
هەلوەستێ گشتی بەری دەستپێكرنا گەڕا 28ێ بڤی شێوەیە.
1- جەوییە 59 خال.
2- شورتە 58 خال.
3- زەورا 52 خال.
4- زاخۆ 47 خال.
5- نەجەف 46 خال.
6- دهۆك 41 خال.
7- نەورۆز 41 خال.
8- نەفت 38 خال.
9- حدود 37 خال.
10- نەفت میسان 36 خال.
11- تەلەبە 34 خال.
12- ئەلمینا 31 خال.
13- كارەبا 29 خال.
14- كەربەلا 26 خال.
15- كەرخ 25 خال.
16- نەفت ئەلبەسرا 25 خال.
17- هەولێر 24 خال.
18- ئەلقاسم 18 خال.
19- ئەمانەت بەغدا 18 خال.
20- نەفت ئەلوەسەت 12 خال.