(هژمارا من) و (هژمارا ته)
غیاس خالد زێبارى
ل ڤى سه‌رده‌مى ته‌كنه‌لۆژیایا پێشكه‌فتى هه‌مى سیكته‌رێن ڕێڤه‌چوونا كارگێریێ پاوان كرینه و بوویه پشكه‌ك ل ژیانا مرۆڤان، كه‌رتێ بانكى و سیسته‌مێ دارایى ژى زۆر ب زیقى كه‌فتیه بن كاریگه‌ریا ڤى سیسته‌مى و بوویه ئه‌گه‌رێ ئاسانكاریێن زۆر بۆ وه‌لاتیان.
حوكمه‌تا هه‌رێما كوردستانێ ب تایبه‌ت كابینه‌یا نه‌هێ ب سه‌رۆكاتیا مه‌سروور بارزانى گرنگیه‌كا زۆر ب دیجیتالكرنا سازیێن حوكمه‌تێ دایه نه‌خاسمه كه‌رتێ بانكى، بۆ ڤێ چه‌ندێ ده‌مێ زێده‌تر ژ ساله‌كێ یه پرۆژه‌یێ دیجیتالكرنا مووچه‌یێ وه‌لاتییان بناڤێ (هژمارا من)
هاتیه راگه‌هاندن و كاره‌كێ باش لسه‌ر هاتیه‌كرن . هه‌بوونا پرۆژه‌یه‌كێ ب ڤى ره‌نگی خزمه‌ته‌كا زۆر دگه‌هینته وه‌لاتى و مووچه‌خۆرێن كوردستانێ وكارئاسانیێن زۆر دكه‌ت، ژلایه‌كێ دیتر فاكته‌ره‌كێ كاریگه‌ر و ئه‌رێنى یه بۆ سه‌رگرتنا پرۆژه‌یه‌كێ چاكسازى د ناڤ مووچه‌خۆرێن كوردستانێ كو چه‌ندین ساله گازنده‌كا زۆر ل سه‌ر هه‌ى، نه‌خاسمه نه‌هێلانا ئه‌وێن زێده‌تر ل مووچه‌یه‌كێ وه‌ردگرن، چه‌ندین خزمه‌تگوزاریێن دیتر ژی د ناڤدا هه‌نه وه‌كى وه‌رگرتنا قه‌را و پێشینه‌یێن بچویك و ساناهیكرنا كڕین و فرۆتنێ و..هتد. دشێین بێژین پرۆژه‌یێ (هژمارا من) پرۆژه‌كێ نشتیمانیێ ئابوورى و دارایى و چاكسازى و بازرگانى و خزمه‌تگوزارى یه.
به‌رامبه‌ر ڤێ چه‌ندێ حوكمه‌تا فیدرال یا ئیراقێ ژى گاڤێن ب ڤى ره‌نگى هاڤێتینه و پرۆژه‌یێ نشتیمانیكرنا مووچه‌ی(ته‌وتین) راگه‌هاندى یه، ئه‌ڤه ژى جهێ ده‌ستخۆشیێ یه، هه‌رچه‌نده پڕانیا خه‌لكێ كوردستانێ ب هه‌بوونا پرۆژه‌یێ هژمارا من دلخۆش بوویه و جهێ ده‌ستخۆشیێ یه، لێ هنده‌ك ئالیێن كوردستانێ جهێ ده‌ستخۆشیێ ل كابینه‌یا نه‌هێ بكه‌ن لسه‌ر ڤى پرۆژه‌یێ مه‌زن و پێدڤى و كاریگه‌ر، هه‌وه‌كا راگه‌هاندنێ و جه‌ماوه‌رى بۆ نه‌شرینكرن و سه‌رنه‌گرتنا پرۆژه‌یێ هژمارا من به‌رپا كریه، به‌رامبه‌ر وێ داخوازا پرۆژه‌یێ ته‌وتینا ئیراقێ دكه‌ن..! هه‌رچه‌نده بابه‌ت پرۆژه‌یه‌كێ دارایى و ئابوورى و چاكسازىێ حوكمه‌تێ یه، لێ وان ئالییان كریه بابه‌ته‌كێ سیاسى و بۆ ڤه‌شارتنا گه‌نده‌لى و كارێن خوه یێن نه قانوونی، دڤێت هژمارا من سه‌ر نه‌گریت و مینا زۆر ره‌فتار و سه‌ره‌ده‌ریێن خوه په‌نا بۆ پرۆژه‌یێن ده‌رڤه‌ى چارچۆڤێ كوردایه‌تیێ بریه. پێدڤیه خه‌لك و مووچه‌خۆرێن كوردستانێ ڤێ راستیێ بزانن و بۆ هه‌ر پلان و به‌رنامه‌یه‌كى، لایه‌نێ كوردایه‌تیێ و نه‌ته‌وایه‌تیێ هه‌لبژێرن، هه‌ر پرۆژه‌یه‌كێ ده‌رڤه‌ى كوردستانێ دهێته دارشتن خزمه‌تا كوردستانیان ناكه‌ت و پرۆژه‌یێ (هژمارا من) پرۆژه‌یه‌كێ نشتیمانی یه بۆ خزمه‌تا خه‌لكێ كوردستانێ، ته‌وتینا ئیراقێ پرۆژه‌یێ وان پیلانگێرایه ئه‌وێن خه‌لكێ كوردستانێ برسى دكه‌ن و ناگه‌هته ركێبه‌كا پرۆژه‌یێ (هژمارا من)، ئه‌وێن دژایه‌تیێ لێ دكه‌ن به‌رژه‌وه‌ندیێن تایبه‌ت هه‌نه و خه‌ما وان پاراستنا به‌رژه‌وه‌ندیێن خوه‌یه نه‌ك به‌رژه‌وه‌ندیێن خه‌لكێ كوردستانێ.
