یاریزانێن زاخۆ، گارە، باتیفا و پیرس رێزێن باش ب دەستڤە ئینان
شاهۆ فەرید:
یاریزانێن چار یانەیێن پارێزگەها دهۆكێ و ئیدارا سەربەخوەیا زاخۆ شیا رێزێن ئێكێ هەتا سێیێ ل سەر ئاستێ كێشێن جەستەیی یا جودا ب دەستڤە بینن پشتی د هەڤڕكیێن قارەمانییا ئیراقێ ل سەر ئاستێ تازەپێگەهشتییان ئەوا 38 یانەیێن ئیراقێ و هەرێمێ ل بەغدا پایتەختێ ئیراقێ پشكداربووین و ئەنجام بڤی رەنگی بوون.
یاریزانێ یانەیا زاخۆ دەلیل شبلی شیا بۆ كێشا 61كگم رێزا ئێكێ بهێت، یاریزانێن یانەیا گارە، حەمید نێجیرڤان بۆ كێشا 53كگم رێزا دویێ هات، یۆسف غانم بۆ كێشا 33كگم رێزا سێیێ هات، یاریزانێ یانەیا پیرس شاهۆار شوكری بۆ كێشا 57كگم رێزا دویێ هات و یاریزانێ یانەیا باتیفا محەمەد مەجید بۆ هەمان كێش ل رێزا سێیێ هات.
د دیدارەكا تایبەت دا هێوا تەحسین راهێنەرێ تایكواندۆیا یانەیا باتیفا بۆ رۆژنامەیا ئەڤرۆ دیاركر: ئێك ژ ب هێزترین قارەمانیێن ل سەر ئاستێ ئیراقێ بۆ دهاتە كرن، مە ب دو یاریزانێن ل سەر ئاستێ تازەپێگەهشتییان پشكداری تێدا كربوو، هەڤڕكییەكا دژوار هەبوو، یاریزانێ مە محەمەد مەجید شیا میدالییا برۆنزی بۆ كێشا 57كگم ب دەستڤە بینت پشتی د یارییا دەستنیشانكرنا خودانێ رێزا سێیێ ب سەركەڤیت.
هەروەسان ناڤهاتی گۆت: هەرچەندە رێزا سێیێ یە و جارا ئێكێ یە ل سەر ئاستێ تازەپێگەهشتییان یاریزان محەمەد پشكداربیت لێ دەستكەفتەكێ باشە و پێنگاڤەكا نایابە بۆ باشتر و هەروەسان پالدەرە بۆ هەموو یاریزانێن مە یێن دی، سۆپاسییا كارگێرییا یانەیا خوە دكەین كو هەر ژ دەستپێكێ و هەتا قارەمانی ژی ب دووماهی هاتین ب هەموو لایەكی ڤە پشتەڤانێن مە بوون، ئەڤە ژی خالەكا گرنگە بۆ پێشئێخستنا یارییا تایكواندۆیێ ل باژێرێ باتیفا و هەموو یاریزان ب گەشبینی دبینن، ب ئۆمێدین بۆ قارەمانیێن دهاتی دێ رێژەییا یاریزانێن مە د پشكدارییان دا زێدەتر بن و دێ شێن دەستكەفتێن باشتر و رێزێن ئێكێ ژی ئینن.
