ئەز ئاستێ مۆزیكا كوردی ب باشی نابینم
زنار تۆڤی:
مۆزیكرەن (كەكۆ ئاكرەیی) د دیدارەكێ دا بۆ رۆژناما ئەڤرۆ گۆت: ئەڤە 30 سالن وەكو مۆزیكژەن ئەز كاردكەم و كاریگەرییا مالباتا من گەلەك ل سەر كارێ من هەبوویە، ژبەركو برایێن من فازل ئاكرەیی و مەحموود ئاكرەیی، وەكو سترانبێژ و مۆزیكژەن، ل گەل هونەرمەندێن نەمر (ئەیاز زاخۆیی و تەحسین تاهای و ئەردەوان زاخۆیی و فوئاد ئەحمەد) و چەندین هونەرمەندێن دی یێن وی سەردەمی كارێن مۆزیكێ كریە.
ناڤهاتی گۆت: نوكە ئەز ئاستێ مۆزیكا كوردی باش نابینم، ژبەركو رەسەناتیا خوە ژ دەستدایە، هندەك كەسێن بازرگان ب ناڤێ هونەر و هونەرمەنداتیێ دربەكێ مەزن ل هونەرێ كوردی یێ رەسەن دایە، بۆ زانین من ل گەل 95% ژ هونەرمەندان كاركریە، بەلێ هەتا نوكە دەلیڤەیا گۆنجایی بۆ من چێ نەبوویە، كو بەرهەمەكی چێكەم، چونكی ژبلی كارێ مۆزیكێ ئەز كارێ شۆفێریێ ژی دكەم و هەكە ل كوردستانێ بام، دا من پتر دەلیڤە هەبیت، كارێن هونەری ئەنجام بدەم.
