ئیلهام ئه‌حمه‌د: دەستێوەردانێن دەرەکی دێ رەوشا سووریێ ئالۆزتر لێ کەن
بەرپرسا پەیوەندیێن دەرڤە یا رێڤەبەریا خوەسەر دیار دکەت، وەکو رێڤەبەریا خوەسەر ئەو کار بۆ پارچەبوونا سووریێ ناکەن و ئەو ل دژی شەڕی نە، لێ د هەمان دەمی دا دڤێت سیستەمێ نوو یێ سووریێ ژی ب دلێ کوردان بیت و دەستێوەردانێن دەرەکی رەوشا سووریێ ئالۆزتر دکەن.
ئیلهام ئه‌حمه‌د بەرپرسا په‌یوه‌ندیێن ده‌رڤه یا رێڤەبەریا خوەسەر د داخویانیەکێ دا راگەهاند کو هه‌ڤدیتنێن وان یێن ل گەل ده‌ستهه‌لاتا نها یا شامێ به‌رده‌وام دکه‌ن و گۆت: (وەکو رێڤەبەریا خوەسەر هەتا نها ژی دانوستاندنێن مە ل گەل شامێ بەردەوام دکەن و مە دڤێت ل گەل شامێ پرسێن هەی چارەسەر بکەین، لێ د هەمان دەمی دا دڤێت سیستەمێ نوو یێ سووریێ ژی سیستەمەک نە ناڤەندی بیت و نابیت شام ب زۆرێ خوە ل سەر کوردان، دورزیان و پێکهاتەیێن دی یێن ل سووریێ فەرز بکەت، د هەمان دەمی دا گرنگە گەلێن سووریێ بریارێ ل دۆر چارەنڤیسێ خوە بدەن، رۆلێ گەلەک وەلاتێن جیهانێ ژ بۆ چارەسەرکرنا پرسا سووریی گرنگە، لێ مخابن هندەک دەستێوەردان هەنە و دەستێوەردانێن نها ژی دبنە ئەگەرێ ئالۆزیێن زێدەتر ل سووریێ).
ناڤهاتیێ راگەهاند کو نابیت ناڤێ سووریێ ببیتە کۆمارا عەرەبی یا سووریێ، چونکی ل سووریێ تنێ عەرەب ناژین، گەلەک پێکهاتەیێن جودا جودا ل سووریێ دژین، ژ بەر ڤێ یەکێ ژی دڤێت ناڤێ سووریێ ببیتە کۆمارا سووریێ و دڤێت سیستەمێ سووریێ ژی سیستەمەک دیموکراتی بیت دا ببیتە جهێ پێکڤەژیانا هەموو خەلکێن کو ل سووریێ دژین، هەکە ئەو یەک نەهێتە کرن دێ پرسێن هەی ئالۆزتر لێ هێن، وەکو رێڤەبەریا خوەسەر و هەسەدە هەتا نها مە گەلەک بزاڤ کرینە دا دوور ژ شەڕی پرسێن هەی چارەسەر بکەین، هەلوەستێ ئەمریکا، فرەنسا و گەلەک وەلاتێن دی ژی گەلەک باشە، لێ مخابن هەلوەستێ تورکیا د جهێ خوە دا نینە، تورکیا دەستێوەردانێ دکەت و رێ نادەت گەلێن سووریێ بریارا خوە بدەن، هەکە دەستێوەردان نەبیت و وەلاتێن دی ژی هاریکار بن دێ خەلکێ سووریێ بریارەکا دروست دەن.
سەبارەت ب هەلوەستێ ئەمریکا ژی ئیلهام ئەحمەد دیار کر، شاندێن ئەمریکا هەتا نها گەلەک جاران ل گەل شامێ و رێڤەبەریا خوەسەر ئاخڤینە و هەتا نها ژی بزاڤێن ئەمریکا بەردەوامن، چونکی ئەمریکی باش دزانن دڤێت دوور ژ شەڕی و ب رێیا دانوستاندنان پرسێن هەی بهێنە چارەسەر کرن، ئەمریکی پشتەڤانیێ ل هەسەدێ و رێڤەبەریا خوەسەر دکەن، ئەمریکا ل دژی مافێن رەوا یێن گەلێ کورد نینە، ئەمریکا دڤێت رەوشا سووریێ ئارام بیت و ژ بەر ڤێ یەکێ ژی داخواز ژ رێڤەبەریا خوەسەر و شامێ دکەت ب رێیا دانوستاندنان بگەهنە چارەسەریەکا گونجای و هەڤدیتن ژی هەتا نها بەردەوام دکەن.
