گۆپیتكا پێشوەخت
ئیحسان حەسەن
ئەنجامێ دیدارا ئەڤ شەڤە د ناڤبەرا یانەیا دهۆك و مێڤانا وێ یانەیا ئەلگەرمە، ئەوا دێ ژ چارچووڤەیێ گوپیتكا هەڤڕكیێن گەرا ئێكێ ژ خولا ئیراقێ یا فوتبۆلێ هێتەكرن، ژ من وەرە دێ یا ڤەكری بیت، ئانكو سەركەڤتن دێ بۆ ئێك ژ هەردو تیمان بیت، یان ژی دێ ب وەكهەڤی رازی بن، هەر چەندە وەكو بۆچوونا من یا كەسوكی ئەز پێشبینا وەكهەڤییێ ناكەم، ژبەر كو ئەلهویێن چیا دشێت ژ ڤێ ئاستەنگێ دا ب سەركەڤتنێ دەركەڤیت، ئەگەر دەستەیا راهێنانێ و یاریزانێن تیمێ شیان مفای ژ سەربۆرێن پێشین بینن، چ ژ یاریێن خوە یێن هەڤالینی یێن كەمپێ خوە یێ راهێنانێ دا ل هەولێرا پایتەخت، یان ئەوێن د ناڤا یاریگەها خوە دا ئەنجامداین، سەرباری هندێ كو دێ یارییا خوە بێ جەماوەر ژبەر سزایێن فدراسیۆنا ئیراقێ یێن وەرزێ بوری كەت، دهۆك ئەوا ل وەرزێ بوری دمەزنترین دەرگەرا چوویە د ناڤا دیرۆكا فوتبۆلا ئیراقی دا، دەمێ ناسناڤێن هەر دو قارەمانیێن خولا یانەیێن كەنداڤی، دیسان كوپا ئیراقێ بۆ جارا ئێكێ د دیرۆكا خوە دا بدەستڤە ئیناین، باش دزانیت گرنگییا بدەستڤەبرنا خالێن ڤێ یاریێ دگەل تیمەكێ ئەوا مەزنترین هەڤبەستێن ڤێ وەرزی دگەل هژمارەكا زوور یا یاریزانێن نافخوە ودەرڤە كرین بۆ هندێ ببیتە هژمارەكا بزحمەت دخولا ڤی وەرزی دا، لەوما دێ هەموو شیانان ئێخیتەكار ژبۆ بدەستڤەئینانا خالێن ڤێ یاریێ و چەكێ وێ دێ هێلا ناڤین و ڕێكخستنا هێلا بەرگیریێ و زاخا یاریزانێن وێ بیت، دیسان خواندنا دروست یا ڕاهێنەرێ وێ بەرازیلی، ژبلی شیانێن تەكنیكی یێن یاریزانێن وێ بیت، ژبەر كو دهۆك باش دزانیت سەركەڤتن دڤێ دیدارا مەزن دا، دێ بیتە پالدەرەكێ سەرەكی ژبۆ بلندكرنا زاخا یاریزانان دیسان مورالا پشتەڤان و حەژێكەرێن تیمێ، دگەل باوەرییا مە كو یانەیا ئەلگەرمە نا بیتە پارییەكێ ب ساناهی، ژبەر كو وان ژی هژمارەكا باشا یاریزانێن زیرەك هەنە و هێزا وێ د سیستەمێ وێ یێ هێرشبەریێ دایە، پێدڤییە ب چ رەنگان هەبیت بهێتە راوەستاندن، ب هیڤیا هندێ كو دادڤانێن یاریێ دباشترین رەوشێن خوەدا بن و ب كێمترین شاشی دەركەڤن داكو ئەڤ دیدارە سۆزا خوە یا دروست بجهبینیت، هەر چەندە دیرۆكا یانەیا دهۆك جوداهییەكا مەزن دگەل یانەیا گەرمە هەیە، لێ دڤێت ئەم باش بزانین كو یانەیا مێڤان ب چ رەنگان وەكو وەرزێ بوری نینە، لەوما پێدڤی بەرپرسێن یانەیا مە خوە دوور بێخن ژ داخویانیێن راگەهاندنێ و گڤاشتنێن زێدە لسەر یاریزان و جەماوەری، ژبەر كو دبیت ب خرابی لسەر ئاستێ یاریزانان و رەفتارێن جەماوەری ب زڤریت، دگەل باوەریا من كو هەر ئێك یێ كو بەرێ خوە ددەتە ڤێ دیدارێ، دێ بەحسێ زەحمەتییا وێ دكەت، لەوما مە ژڤانە دگەل شەڤبیریەكا فوتبۆلێ یا مەزن ب ستێرێن خوە، بەلێ یا ڤالا ژ پەلوكێن خوە، دیاریەكێ دا ب هەموو رەنگ وێنێن خوەڤە مە دڤێت دهۆكی بیت.
