گەنجێن رۆژهەلاتێ کوردستانێ پشتەڤانێن لیستا سەرۆک بارزانی نە
هۆشەنگ تاجر:
گەنجێن رۆژهەلاتێ کوردستانێ پشتەڤانیا خوە بۆ لیستا پارتی دیموکراتی کوردستان دیار دکەن و داخواز ژ خەلکێ هەرێما کوردستانێ دکەن پشتەڤانیێ ل لیستا ریفراندۆمچیان و لیستا سەرۆک بارزانی بکەن چونکی بێی پارتی کەس نەشێت بەرگریێ ل مافێن کوردان بکەت.
ئەحمەد خالدی قۆتابیێ زانکۆیێ بۆ ئەڤرۆ دیار کر، وەکو رۆژهەلاتێ کوردستانێ ئەو گرنگیەکا گەلەک مەزن ددەنە هەلبژارتنێن پەرلەمانێ ئیراقێ، چونکی بهێزبوونا پارتی دیموکراتی کوردستان ل بەغدا د بەرژەوەندیا هەموو کوردان دایە، پارتی تنێ بەرگریێ ل مافێ کوردان ل باشورێ کوردستانێ ناکەت، بەلکو د چەند سالێن بۆری دا پارتی بوویە هێزا هەری مەزن و سەرەکی بەرگری ل مافێن کوردان ل هەموو پارچەیێن کوردستانێ کریە، ژ بەر ڤێ یەکێ ژی گرنگە هەموو دەنگدەرێن ل هەرێما کوردستانێ پشتەڤانیێ ل لیستا سەرۆک بارزانی کو لیستا سەربخوەیا کوردستانێ یە بکەن دا پێگەهێ کوردان ل بەغدا یا بهێز بیت.
زەهرا سادقی چالاکڤانا مافێن ژنان ژی دیار کر، ل بەغدا بزاڤەکا گەلەک مەزن ل دژی کوردان هەیە، د دو سالێن بۆری دا هێزێن شیعە ل بەغدا کارتا مووچەیی ل دژی خەلکێ کوردستانێ بکار ئینان، مخابن د ناڤ هەرێما کوردستانێ دا ژی هندەک هێز یێ بۆ بەرژەوەندیێن بەغدا کار دکەن، ژ بەر ڤێ یەکێ ژی دڤێت د ڤان هەلبژارتنان دا خەلکێ کوردستانێ پشتەڤانیێ ل لیستا پارتی دیموکراتی کوردستان بکەن، لیستا ٢٧٥ دڤێت ل بەغدا بهێز بیت دا بشێت بەرگریێ ل مافێن هەموو خەلکێ هەرێما کوردستانێ بکەت و گۆت: (بۆ مە وەکو گەنجێن کورد یێن رۆژهەلاتێ کوردستانێ، هەکە هەرێما کوردستانێ بهێز بیت دێ پێگەهێ کوردان ل هەموو دەڤەرێ بهێز بیت، ژ بەر ڤێ یەکێ ژی ئەم داخواز ژ هەموو برایێن خوە ل هەرێما کوردستانێ دکەین دەنگێ خوە بدەنە لیستا سەرۆک بارزانی، لیستا ٢٧٥ کو نوونەراتیا هەموو کوردێن ئازادیخواز دکەت).
فەرید مورادی مامۆستایێ زانکۆیێ ژی دیار کر، یا راست هەلبژارتنێن ڤێجارێ گەلەک جودا و گرنگن، چونکی ل رۆژهەلاتا ناڤین گوهۆڕینێن گەلەک بلەز روو ددەن، هەکە کورد بهێز بن دێ شێن ل ئیراقێ بنە هێزەکا گەلەک مەزن و کاریگەر، هێشتا ژی مەترسی ل سەر کوردان ل ئیراقێ هەنە، چونکی هێزین شوفینی ل بەغدا ناخواز کورد بهێز بن، بۆدجێ هەرێما کوردستانێ نادەن و مووچە ژی وەکو کارتەکێ ل دژی خەلکێ کوردستانێ بکار دئینن، ڤێجا گرنگە ل دژی سیاسەتا خراب یا بەغدا کورد پشتەڤانیێ ل لیستا سەرۆک بارزانی بکەن دا پێگەهێ کوردان ل بەغدا بهێزتر بیت و گۆت: (پێدڤیا کوردان ل هەرێما کوردستانێ ب لیستەکا بهێز هەیە کو بشێت بەرگریێ ل مافێن نەتەوەیی یێن گەلێ کوردستانێ بکەت، هێزێن دی تنێ ژ بۆ بەرژەوەندیێن خوە دچنە بەغدا، ل بەغدا گەلەک جاران هندەک هێزێن کوردی بووینە ئاستەنگ ل هەمبەر مافێن گەلێ کوردستانێ، ژ بەر ڤێ یەکێ ژی هیڤیدارم گەلێ مە ل هەرێما کوردستانێ ب رێژەیەکا مەزن بچنە سەر سندۆقێن دەنگدانێ و دەنگێ خوە بدەنە لیستا پارتی دیموکراتی کوردستان).
ل ئالیێ دی گەلەک کەسایەتیێن رۆژهەلاتێ کوردستانێ ژی ب رێیێن جودا جودا داخواز دکەن کورد دەنگێ خوە بدەنە لیستا پارتی دیموکراتی کوردستان دا پێگەهێ کوردان ل بەغدا بهێز بیت، چونکی د چەند سالێن بۆری دا تنێ پارتی شیایە پیلانێن ل دژی هەرێما کوردستانێ ژناڤ ببەت، نها ژی گەلەک پیلان ل دژی هەرێما کوردستانێ ل بەغدا دهێنە گێران و ژ بۆ بهێزبوونا قەوارێ هەرێما کوردستانێ دڤێت وەلاتیێن هەرێما کوردستانێ پشتەڤانیێ ل لیستا پارتی دیموکراتی کوردستان بکەن.
