پێدڤییا كوردستانێ و ئیراقێ ب كێ هەیە؟
غیاس خالد زێباری
رۆژا ١١/١١/٢٠٢٥ بۆ خەلكێ ئیراقێ و كوردستانێ رۆژەكا تایبەت و دیرۆكی بوو، ئەو ژی رۆژا هەلبژارتنێن گشتی یە بۆ جڤاتا نوونەرێن ئیراقێ، ئەڤ هەلبژارتنە د دەمەكی دانە كۆ ئیراق و كوردستان د رەوشەكا تایبەت دانە و پێدڤی ب هەڵویست و گۆهرینا یە، هەڵویست و گۆهڕینێن بەرەڤ سەقامگیریەكا باشتر و ڤەگەریانا سەروەریەكا راستەقینە بۆ ئیراقێ، چونكی ل ڤان سالێن داویێ ساڵ بۆ ساڵێ سەروەریا ئیراقێ بوویە جهێ پسیارێ و ژ بن كاریگەریێن دەرەكی، گەهشتیە وی ئاستی سەنگ و بهایێ ئیراقیبوونێ ل دەڤ هندەك ئالیێن سیاسی یێن خوەدان گرۆپێن چەكداری ل سەنگ و بهایێ وەڵاتێن دەرەكی سڤكتر و كێمتر ببیت، ڤێ چەندێ ل سەر ئاستێ نیڤدەولەتی ژی دەنگڤەدان هەیە و هەوڵێن دهێنەدان ئیراقێ لڤان قەیران و ئاستەنگا رزگار بكەن و لسەر ئاستێ جادا ئیراقێ ژی دەنگێن نەڕازیبوونێ لڤێ رەوشێ بلند بوونە . هەرچەندە لسەر ئاستێ هەرێما كوردستانێ جوداهیەكا زۆر ل گەل ئیراقێ هەیە نەخاسمە ژلایێ سەقەمگیریێ و ئاڤەدانیێ، لێ ئەو ئاستەنگ و قەیرانێن ئابووری و دارایی یێن حوكمەتا ئیراقێ ژبن كاریگەریا وان هێزێن خوەدی چەكدار بۆ كوردستانێ دروست كری كاریگەریەكا نەرێنی درۆستكریە، لێ باوەری بۆ خەلكێ كوردستانێ چێبوویە كۆ هەرێما كوردستانێ چ گونەها خوە نیە و ب زێدەیی ئەركێن خوە بجهــ ئینانە و ئەوا هەیی بەهانەیێن بێ بنەما و رەفتارێن دۆژمنكارانەنە بەرامبەر كوردستانێ دكەن، مخابن هندەك ئالیێن سیاسی یێن كوردستانێ ژی ژبووی بەرژەوەند و دەستكەفتێن حزبی چووینە بەرەیێ دژی كوردستانەكا بهێز و ڤەگەراندنا وان مافێن دەستووری . زۆر گرنگو پێتڤی یە خەلكێ ئیراقێ د ڤان هەلبژارتناندا بریارەكا ئێكلاكەر و چارەنڤیسساز بدەت و وان كەس و لایەنان بۆ جڤاتا نوونەرێن ئیراقێ هەلبژێریت ئەوێن بهایێ دەستوورێ ئیراقێ و پیرۆزیێن وێ و جڤاكێ وێ بپاریێزیت و بشێن ئیراقێ ل ڤان قەیرانا رزگار بكەت و سەروەریێ و باوەریا نیڤدەولەتی بۆ ڤەگەرینیت . هەر وەسا فەرە خەلكێ كوردستانێ زۆر ب ژیرانە و ب هەستەكا بلندنا نشتیمانی پشكداریێ د ڤان هەلبژاتنا بكەت و دەنگی ب وی لایەنی بدەت ئەوێن داكۆكیێ ل پاراستنا مافێن دەستووریێ خەلكێ هەرێما كوردستانێ دكەت و ب هێزەكا زێدە ل بەغدا هەوڵ بدەت وان بنپێكریێن دەستووری دژی خەلكێ نەهێلیت و كار بۆ ئاشتەوایێ و سەقامگیریێ دكەت و بەرژەوەندیێن خەلكێ كوردستانێ و ئیراقێ ل سەرڤەی هەمی بەرژەوەندیان دبینیت و ئالیێن بێ پرۆژێن نشتیمانی و نەتەوەیی لاواز و شەرمزار بكەت.
