ژنەك خوارنگەهەكێ ل دهۆكێ ب رێڤە دبەت
سندس سالح سلێڤانەیی:
رێژین ئەحمەد، كو ئێك ژ مەدیاكارێن بەرنیاسێن دهۆكێ یە، لڤێ دووماهیێ رابوویە ب ڤەكرنا جهەكێ تایبەت ب خوارنێن تێشتێ یێن كوردەواری و ب گۆتنا وێ ئەڤە ئێك ژ خەونێن وێ بوویە كو بجهـ هاتی و بۆ پاشەرۆژێ گەلەك هزر و پرۆژەیێن دی ژی دسەرێ وێ دا هەنە.
رێژینێ، بۆ رۆژنامەیا ئەڤرۆ گۆت: ژبلی كارێ راگەهاندنێ و پێشكێشكاریا بەرنامەیان، ئەز گەلەك حەزژ چێكرنا خوارنێن كوردی ژی دكەم و ژمێژە من ل سەر وێ چەندێ كاردكر كو من جهەكێ تایبەت ب وێ چەندێ ڤە هەبیت، پشتی دەلیڤە هاتی ئەز چوومە (كۆچكا مالا باپیری) كو ئێك ژ قەسرێن ناڤدارە ل دهۆكێ و پتری (80) سالانە هاتیە ڤەكرن، ب هاریكاریا خێزانا خوە ئەم شیاین خوارنگەهەكا بچووك كو یا تایبەتە ب سپیاتی و خوارنێن كوردی ڤە، ل گەل نانێ تەنكی و سەوكێن قورادان و گەلەك جۆرێن دی ڤەكەین، هەر چەندە جارێ دەستپێكە، لێ هاتنا خەلكی بۆ خوارنا تێشتێ لڤی جهی یا باشە حەزژ خوارنێن كوردی دكەن و گەلەك كەیفا وان دهێت دەمێ من دبینن و دبێژنە من كەیفخۆشین كو ژنەك ڤێ خوارنگەهێ ب رێڤەدبەت.
هەروەسا گۆت: هەردەم ئەز دبێژم كار هەر كارە و هەر كارەكێ هەبیت هەردو رەگەز دشێن ئەنجام بدەن، لێ ب مەرجەكی هەكە باوەری ب خۆ هەبیت و خودان ئیرادە بیت، بۆ ژنان ژی پشتەڤانی و دەستخۆشی بۆ هەبیت، ب تایبەت ژلایێ هەڤژین و خێزانا وێ ڤە و سوپاس بۆ خودێ من باوەریا ب خوە هەی و خێزان و دەروبەر ژی هەموو دهاریكارن، لەورا ئەم ژی درێڤەبرن و سەرپەرشتیا ڤی جهی دا خۆ سەكەفتی دبینین.
