ڕێبازا پەروەردەیێ د ناڤبەرا ڕەوشت و تیتالان و پێشكەفتنا سەردەم دا
دلهین حەمدی
ل بەراهیێ ئەگەر ئەم پێناسەیەكێ بدەینە پەروەردێ دێ بینین پەروەردە ئەو بنەمایە یێ كو پاشەڕۆژا تاكی و جڤاكی ل سەر هاتیە ئاڤاكرن و ل دویڤ بیروباوەران ل ژینگەهەكێ بۆ ژینگەهەكا دیتر جیاوازە و هەروەسا حەزا فێربوون و زانینێ ژی ل گشت كۆمەلگەهان دا وەك هەڤ نینە، د ناڤبەرا پەروەردەكرنا كەڤن كو پشت ب داب و نەریتان گرێ ددەت دگەل پەروەردەكرنا سەردەم كو گرنگیێ ب زانست و زانینێ ددەت ئەڤجا كیشك ژ ڤان هەردو شێوازان گەرەنتیا پەروەردەكرنەكا ساخلەم و نەوەیەكێ سەركەفتی دكەت كو شیانێن ڕوی ب ڕوی بوونا ئاستەنگێن سەردەم هەبیت؟ ل جڤاكێن كو پشتبەستنێ ل سەر داب و نەریتان دكەن پەروەردەكرن ل سەر بنیاتێ پێگیربوون ب بابەتێن جڤاكی دهێتە ئاڤاكرن و زارۆك فێر دبیت ڕێزێ ل مەزنان بگریت و داب و نەریتان جێبەجێ بكەت و تێكەلیێ ل گەل خێزان و جڤاكی بكەت بێی كو گەلەك پرسیاران بكەت و ئەڤ جۆرێ پەروەردەكرنێ هەستكرن ب بەرپرساتیێ زێدە دكەت لێ هندەك جاران بیر و بۆچوونێن ڕەخنەگرتنێ سنووردار دكەت، بۆ نموونە دبێژن دڤێت زارۆك فەرمانێن دایك و بابا و مەزنان جێبەجێ بكەت بێی كو گرنگی ب ناڤەڕوكا وێ فەرمانێ بهێتە دان و ئەڤە ژی دێ كارتێكرنێ ل زارۆكی كەت و شیانێن بڕیاردانێ ژی نابن ل پاشەڕۆژێ لێ پەروەردەكارێن پەروەردەیا كەڤن شیاینە سەربكەڤن د پاراستنا ناسنامەیا كولتووری و ئێمناهیا خێزانێ دا و ئەو زارۆكێن د ڤی جۆرێ ژینگەهێ دا پەروەردە دبن كو ڕێزێ ل داب و نەریتان دگرن پێگیرن ب بابەتێن جڤاكی لێ ب زەحمەت دشێن خۆ دگەل ژینگەهەكا جیاواز بگونجینن. ژ لایەكێ دی ڤە پەروەردەكرنا سەردەم ل سەر بنیاتێ زانین و زانستی و دەرۆنناسیێ هاتیە ئاڤاكرن كو زارۆكی هانددەت بۆ هزركرن و بیر و بۆچوونێن ڕەخنەگرتنێ و ئازادی د بڕیاردانێ دا ل سەر بنیاتێ تێگەهشتنێ ل دەوروبەران و ئەڤ شێوازێ پەروەردەكرنێ شیانێن فێربوونێ و داهێنانێ ل دەف زارۆكی زێدە دكەت و بەرهەڤ دكەت كو ب شێوەكێ سەربەخۆ ڕوی ب ڕوی ئاستەنگێن ژیانێ ببیت و ئەو زارۆیێن ب ڤی شێوەی پەروەردە دبن دشێن ب سەر گەلەك ئاستەنگان دا سەربكەڤن، لێ هندەك جاران نەشێن خۆ دگەل داب و نەریتێن جڤاكی بگونجینن كو دبیت بۆ زارۆكی د نوی بن و ئەڤە دبیتە ئەگەرێ تێكچوونا دەروونێ زارۆكی تا ڕادەیەكێ، پشتی زانینا ڤان هەردو شێوازان دشێین بێژین كو ئاڤاكرنا نەوەیەكێ سەركەفتی درستكرنا هەڤسەنگیێ یە د ناڤبەرا ڕەوشت و تیتالان و زانست و زانینێ دا، دڤێت زارۆكان فێر بكەین ڕێزێ ل وان بابەتێن جڤاكی بگرن كو دبنە ئەگەرێ سەقامگیریا خێزانێ و پێشڤەچوونا جڤاكی و د هەمان دەم دا دڤێت مافێ هندێ بدەینێ كو د ئازاد بن د بیر و باوەرێن خۆ دا.
ژ لایەكێ دیتر ڤە و ل هندەك جڤاكان دا دەرفەتا خواندنێ و فێربوونێ بۆ ئافرەتان یا سنووردارە و د هەمان دەم دا هندەك ڤەكۆلینان ئاشكرا كریە كو پەروەردە و فێربوونا ئافرەتێ زۆر یا گرنگە ژ گشت ڕوییەكێ ڤە و دبیتە ئەگەرێ بارسڤكیێ ژی بۆ خێزانێ د وارێ كار و ئەركێن خێزانێ دا و هەروەسا گەلەك جاران ئافرەتا تێگەهشتی و پێگەهشتی و خۆدان باوەرنامە گەلەك ئەركێن حوكمی و كارگیری پێ دهێنە ڕاسپاردن و مل ب ملێ زەلامی خزمەتێ دكەن و هەڤسەنگیێ پەیدا دكەن د وارێ ڕێڤەبرنێ دا، چونكی دهێنە چەكداركرن ب زانست و زانینا سەردەم و خزمەتەكا بێی جیاوازی ژی پێشكێش دكەن جیاواز ژ سەردەمێن بەری نوكە كو بتنێ ئافرەت وەك كابانی دهاتە هەژمارتن د ناڤا سنوورێ مالەكا دیاركری دا و مافێ وێ نەبوو كارێن دەرڤەی سنوورێ مالا خۆ ئەنجام بدەت و ب ڤی ڕەنگی جۆرە ستەمەك ژی ل ئافرەتێ دهاتە كرن وەك مرۆڤ و دهاتە ڤەقەتاندن ژ جیهانەكا پڕی زانست و زانین و خۆپێشڤەبرن، ل دوماهیێ پەروەردە و فێربوون ماف و ئەركەكێ مرۆڤایەتی یە و نابیت هیچ كەسەك یان ڕەگەزەك ژێ بهێتە ڤەقەتاندن و بێباركرن.
