خێزانەك ل دهۆكێ خوارنگەهەكێ ب رێڤەدبەن
سندس سالح سلێڤانەیی:
رێژین ئەحمەد، كو ئێك ژ پشكدارێن فێستیڤالا شەڤانێن سەرێ سالێ یە، ئەوا ل (فاملی مۆلا) دهۆكێ هاتیە ڤەكرن، د دیدارەكێ دا بۆ رۆژنامەیا ئەڤرۆ دیاركر كو گەلەكا گرنگە بەردەوام ئەڤ قێستیڤالە هەبن، چنكو ل جهێن هوسا دەلیڤەیا كاری بۆ گەلەك كەسان ژ هەردو ڕەگەزان، ب تایبەت ژنان دهێتە ڤەكرن كو بهێن بەرهەمێن خۆ نیشابدەن و بفرۆشن و ئەڤە چەندە ژی دێ بیتە دەرگەهەك كو داهاتەك بۆ هەر پشكدارەكی ژێ بهێت.
هەروەسا گۆت: بەری چەند هەیڤان من و هەڤژینێ خۆ (رەنج) ی، خوارنگەهەكا خوارنێن كوردی د ناڤ (كۆچكا مالا باپیری) دا ڤەكریە و ئەم وەك ئەندامێن خێزان لێ كاردكەین و پشتەڤانیا هەڤژینێ بوویە ئەگەرەك كو ئەم پتر د بەردەوامبین، هەروەسا كارێ خۆ پێشبێخین.
