ب قەزاكرنا قەرەتەپە و گولالە بنپێكرنەكا دیار یا دەستوورییە
ل ڕۆژا سێشەمبی 24/2/2026، لقێ 15 یێ پارتی دیموكراتی كوردستان ل خانەقینێ، د بەیاننامەیەكێدا ڕەتكر كو باژێركێن قەرەتەپە و گولالە (جەلەولا) ببنە قەزایێن سەربخوە و ژ قەزا خانەقینێ بهێنە جوداكرن، هەروەسا ڕاگەهاند ژی كو ئەو پێنگاڤە بنپێكرنەكا ڕۆهن یا دەستوورێ ئیراقێ یە.
د بەیاننامەیا لقێ 15 یێ پارتی دیموكراتی كوردستان ل دۆر وێ پرسێ هاتیە» ئەم دوپات دكەین كو ئەو پێرابوونە بنپێكرنا مادەیا 140 ژ دەستوورێ ئیراقێ یە، كو نەخشەڕێكا قانوونی بۆ چارەسەركرنا ڕەوشا دەڤەرێن ناكۆكی ل سەر ب ڕێكا ئاساییكرنێ، سەرژمێریێ و راپرسیێ دیاركریە».
پارتی وێ بڕیارێ ب « گوهۆڕینەكا كارگێڕی و دیموگرافییا تاكلایەنە» د هەژمێریت و دوپاتیێ ل وێ چەندێ دكەت كو خانەقین ب هەموو پێكهاتەیێن خوە یێن نەتەوەیی و ئایینی ڤە، نموونەیا پێكڤەژیانا ئاشتییانەیە و هەر دەستكاریكرنەك د پێگەهێ كارگێڕی ژ دەرڤەی چارچۆڤەیێ دەستووری، بنپێكرنا ئیرادەیا خەلكێ وێ یە.
لقێ 15 یێ پارتی داخوازا هەلوەشاندنا تمام یا وان بڕیاران كر و دیاركر» پشتەڤانییا خوە یا تمام بۆ جەماوەرێ سەربلندێ خانەقینێ و داخوازیێن وان یێن ڕەوا دوپات دكەین، هەروەسا پشتەڤانیێ ل هەر كارەكێ گشتیێ ئاشتییانە و مانگرتنەكێ دكەین كو بۆ بەرگریكرنێ ژ مافێن خوە یێن دەستوورێ ئەنجام بدەن».
ل دووماهییا بەیاننامەیا خوە دا، لقێ 15 یێ پارتی دیموكراتی كوردستان ل خانەقینێ داخواز ژ هەموو ئالییان دكەت» بەرپرسیارەتییا خوە یا نیشتمانی بپارێزن بۆ ئارامی و ئێكڕێزییا و ڕێزێ ل ئیرادەیا خەلكێ خانەقینێ بگرن».
