د ناڤبەرا سۆل و بزمارێ دا
ئـارام دهـۆكـی
كوردان ل سەر كاودانێن ئەڤرۆ تووشبینێ د گەل ڤی شەڕێ ل رۆژهەلاتا ناڤین گۆتنێن مەزن و پێشینا هەنە دەما دكەڤنە بارودۆخەكێ ب زەحمەت دا، بزانن چ بێت كرن دروستە، ئەو ژی بریاردانەكا خۆ بدنە ل گەل ئەمریكا و ئیسرائیلێ یان ل گەل ئیرانێ.
هەلبەت د ڤێ هەڤكێشێ دا نە ب ساناهیە بریارێ بدەی و پشتراست بینی زمان كا كیژان لایەن باشترە و كیژ خرابترە. كورد خۆ نەدەنە ل گەل ئەمریكا گەلەك ترسناكە و بریارەك خەلەتە، ژ بەر كو كورد بۆ ماوەیەكێ درێژە د چاڤێن وەلاتێن دەوروبەر و هێزێن دژی ئەمریكا هەمیان جوهیێن دوویێ دئێن ل قەلەمدان و دهێن گۆتن كو كورد خائینن و بەریكا ئیستعمارێ و ژ دین دەركەتینە و قەتلێ وان یێ حەلالە و..هتد. پرس ئەڤەیە گەر ئەمریكا پشتا خۆ دا كوردان ل گەل رۆژئاڤای دێ حالێ كوردان چ بە د دەستێن ڤان وەلات و هێزێن تێرۆرست دا، مینا داعش و حەشد شەعبی و دەولەتا تورك و ئیرانێ و سووریێ و ئیراقێ و..هتد. ئەڤان وەلاتان ب درێژیا سالێن بووری كوردان ب نێزیكی ل گەل هەڤپەیمانان و ئەمریكا ب تایبەت كاركریە ئێدی ژ ناڤبرنا سەدامی و ئینانا ئەمریكا بۆ ئیراقێ و تێكشكاندنا تەڤنێ داعشێ ب سەرپەرشتیا توركی ڤە و دژاتیكرنا تەڤنێ ئەحمەد شەڕعی و دژاتیا حەشدا شەعبی یا ب سەر ئیرانێ ڤە ئەڤ هەموو بەرخۆردێن كوردان كو دگونجای بووین ل گەل ئەمریكا و رۆژئاڤای هەموو ل بیرانا وان د ڤەساندینە بۆ هەلەكێ كو هەردەمێ شیان دەرفەت بۆ چێبە و دربەك كوشندە ل كوردان بدەن، لەوا نەبوونە بەشەك ژ هێزا ئەمریكا بریارەك نە دروستە و ترسناكە! لێ ئالەیەك دن گەر ل كاودانان بنێڕی دێ خراپتر هێت دیتن ئەوژی ئەوە ئەڤە بۆ چەندین جارانە كورد ب وەریسێ ئەمریكا چوونە كەڤری و ئەنجاما هەر جارە كێ ژ یادی خرابتر بوویە، هەر ژ ١٩٧٥ ژ شكەستنا شۆرشا ئیلۆنێ و هەتا دگەهیتە ٢٠٢٥ كو چ ب سەرێ كوردین رۆژئاڤا ئینا كو پتر ژ چەندین جاران پشتا كوردان بەردا و مانە بتنێ د دەستێن دوژمێ وان دا، كو ئەوژی بوونە ئەگەرا شكەستنا كوردان كو بگەهن ئارمانجێن خۆ. ئەڤان هەموو جاران ئێدی كورد گەهاندینە وێ قەناعەتێ كو پشتبەستن ب ئەمریكا بریارەك نەدروستە خۆكوژیەكا سیاسی و لەشكەرییە ژ بەر كو ل دوماهیێ و بەراهیا ئەمریكا تەنێ بیر ل بەرژەوەندییا خۆیا مادی دكە و بەس درووشمێن دیموكراسیێ و مافێ مرۆڤان و گەلان هەموو د بێ بنەمانە ب چ ناچن.
د هەڤكێشەك وەسان دا گەر تو خەبیر بی د سیاسەتێ و چالاكیێن لەشكەری دا نەیا ب ساناهیە بێتە گۆتن كیژ ژ كیشكێ باشترە بكەی، خۆ ئەگەر بێژی ئەزێ مام ناوەند بم ژی دبیت نە بریارەك دروست بە، ژ بەر كو ئالیێ دوژمن نا نێریتە تە وەكو بریارەك ئەڤرۆ تەنێ ب وی چاڤی ل تە بنێڕە ژ بەركو بەریا نهۆ حوكم ل سەر تە هاتیەدانان و دیساڤە گەر دەلیڤە بۆ پەیدابە؛ وێ وان تۆلا ژ تە بستینە. ل ئالیەك دن گەر تو لایەك مینا كوردان بێ هەلوەست بمینە د شەڕێ چارەنڤیساز دا دبیت د بریارێن چارەنڤیساز دا ژی كورد وەكو هەڤكێشەك ئالۆز نەهێن حسابكرن و ل دویڤ هەلوەست و بەخۆردان، بنێڕن ل كێش و مافێن وان بریار بێت دان. ئەڤجا بیركرن د ڤێ ئارێشێ دا گەلەك ژ هندێ كویرترە كو ب ساناهی بڕیارێ بدەی، ژ بەر كو ئەڤە ئاریشەكا دوهی و ئەڤرۆ و سوبەهییە چ بریارە كو بیر ل هەمیان بكەی هزرا دوهی و ئەڤرۆ و ئەنجاما سوبە بكەی؛ هەموو هەڤكێشەیێ تێدا ب زەلالی ببین. لەوا كێشەیین وەسا ئالۆز كوردان ئانییە زمان، ئەم یێن د ناڤبەرا سۆل و بزمارێ دا كو هەر بڕیارەكا بدەی ژان و خوسارەتیا تێدا، لێ باش بیت یان خراب ئەم وەكو كورد هەر یێن ل سوبەیەكا ئارامتر و سەرفەرازتر دگەریێن. لەوا تو خۆ رازی بكە كیژ ژ هەرسێ بیرۆكەیان باشترە و د بەرژوەندییا گەلێ كورد دایە!.
