ئەڤرۆ ئەلهۆیێن چیا ل بەغدانە و دێ بزاڤێن سەركەڤتنا 14ێ د خولێ دا كەن
قەیس وەیس:
دهێتە چاڤەڕێ كرن ئەڤرۆ دەست ب هەڤڕكیێن گەڕا 36ێ یا خولا ستێرێن ئیراقێ یا فوتبۆلێ ب ئەنجامدانا پێنج یارییان، ئەلهۆیێن چیا دێ ل بەغدا شەڕی بۆ سێ خالان كەت و سوبەهی زاخۆ دێ ل سلێمانیێ بیتە مێڤانا نەورۆز ئێك ژ كلاسیكۆیێن كوردستانی دا و هەولێر د دیدارەكا چارەنڤیس دا ژبۆ مسۆگەركرنا ڕێزبەندییا خوە.
ئەلهۆیێن چیا ب مۆرالەكا بلندن
بڕیارە ئەڤرۆ ل دەمژمێر هەشتی شەڤ تیما یانەیا دهۆك ل یاریگەها كەرخێ ل پایتەختێ ئیراقێ بەغدا ببیتە مێڤانا یانەیا نەفت د یارییەكا گرنگ دا بۆ ئەلهۆیێن چیا ئەوا د نوكە دا ل ڕێزت 10ێ دهێت ب كۆمكرنا 49 خالان ژ 13 سەركەڤتن، 10 وەكهەڤیان و 12 خوسارەتی هەنە، خودانێن ئەردی ل ڕێزا 13ێ دهێت ب كۆمكرنا 41 خالان ب تنێ نەهـ سەركەڤتن هەنە، 14 وەكهەڤی و 12 خوسارەتی.
هاریكارێ ڕاهێنەری گەشبینە
د پرێس كۆنفرانسێ رۆژنامەڤانی دا موهەنەد زێدان هاریكارێ ڕاهێنەرێ تیما یانەیا دهۆكێ گۆت: یارییا ئەڤرۆ بۆ مە هەردو تیما گرنگە سەرباری چو گوهۆڕینان پەیدا ناكەت نەك هەڤڕكییا ڕێزبەندیێ و نەك كەڤێن داكەڤتنێ، لێ وەكو یاری ئەم هەردو تیم دێ بۆ سێ خالان هەڤڕكیێ كەین، تیما نەفت د ناڤ ئەردێ خوە دا ئاستەنگا بۆ هەڤڕكێ خوە چێدكەت و پڕانییا ئەنجامێن وێ ل ئەردێ وێ دا وەكهەڤی و سەركەڤتنن، مە ژ هەر روویەكی ڤە خواندییە بۆ هندێ بشێن ئەنجامەكێ باش بینن و مە پلانێن سەركەڤتنێ داناینە، لێ یاری ب سانەهی نابیت و دێ هەڤڕكی هەتا فیركا دادڤانی بەردەوامبیت.
ژلایێ خوەڤە عادل نعمە ئەوچەندە دیاركر كو تیما دهۆكێ ب پێكهاتییەكێ خودان شیان هەنە و هەموو یارییان ب مۆرالەكا بلند دهێنە دناڤ یاریگەهێ دا و گۆت: پرانییا یاریێن مە ب وەكهەڤی ب دووماهی هاتینە، د قووناغا ئێكێ دا بێ گۆل ل دهۆكێ وەكهەڤبووین، لێ دڤێ یاریێ دا هەموو پێشبینیەك دهێتە كرن، ئەم هەردو تیم ئاستێ یێ بەرانبەر دزانین و دێ یارییەكا ب هێز هێتە كر، ژبەركو ئاستێ هەردو تیما باشتر بوویە و ئەم هەردو تیم دێ بزاڤێن سەركەڤتنێ كەین، چو نهێنیێن ئاست و هونەری دناڤبەر هەدو تیمان دا نینن و یاری ب سانەهی نابیت ، یارییا ئەڤرۆ بۆ مە ژی گرنگە دا بشێن پێشڤەچوونەكێ د ڕێزبەندییا خوە دا بكەین.
ژ یاریێن دی یێن ئەڤرۆ
دیالا – ئەمانەت بەغدا، یاریگەها دیالا، دەمژمێر 5:30 ئێڤاری.
كارەبا- ئەلغراف، یاریگەها زەورا، دەمژمێر 5:30 ئێڤاری.
ئەلقاسم- نەفت میسان، یاریگەها نەجەف، دەمژمێر 5:30 ئێڤاری.
تەلەبە- ئەلگەرمە، یاریگەها ئەلمەدینە، دەمژمێر هەشتی شەڤ.
گۆلكەرێن پێشیێ یێن خولێ بەری دەستپێكرنا ڤێ گەڕێ
1- شیرزۆد تیمیرۆڤ 28 گۆل، یانەیا هەولێر.
2- عەلا ئەلدالی 19 گۆل، یانەیا مووسل.
3- پیتەر گۆرگیس 18 گۆل، یانەیا دهۆك.
4- كینگسلی كۆكۆ 17 گۆل، یانەیا ئەلغراف.
5- كریستیان ئیتیبا 17 گۆل، یانەیا شورتە.
6- یونس حەمۆد 14 گۆل، یانەیا كەرخ.
7- محەمەد جەواد 12 گۆل، یانەیا جەوییە.
8- داودا دیمی 11 گۆل، یانەیا نەفت میسان.
9- حەسەن عەبدولكەریم 11 گۆل، یانەیا زەورا.
10- لۆكاس سانتۆس 10 گۆل، یانەیا كارەبا.
ڕێزبەندییا خولێ بەری دەستپێكرنا یاریێن گەڕا 36ێ.
1- جەوییە 80 خال.
2- شورتە 76 خال.
3- هەولێر 70 خال.
4- زەورا 66 خال.
5- تەلەبە 62 خال.
6- ئەلگەرمە 58 خال.
7- كەرخ 56 خال.
8- زاخۆ 55 خال كێمترییا یارییەكێ.
9- نەورۆز 50 خال.
10- دهۆك 49 خال.
11- دیالا 46 خال.
12- مووسل 43 خال.
13- نەفت 41 خال.
14- ئەلغراف 40 خال.
15- كارەبا 34 خال كێمترییا یارییەكێ.
16- مینا 34 خال كێمترییا یارییەكێ.
17- نەفت میسان 34 خال.
18- ئەمانەت بەغدا 31 خالان
19- نەجەف 17 خالان دو یاری كێمترن
20- ئەلقاسم شەش خال.
بۆ زانین هەر ئێك ژ یانەیێن ئەلقاسم و نەجەف ب فەرمی پاشڤەچوونا خوە بۆ پلا نایاب ئێكلاكرییە، هەردو یانەیێن ئەمانەت بەغدا و نەفت میسان دێ بزاڤێن خوە پاراستنێ ژ ڕێزبەندییا 18ێ كەن ژبەركو ئەو تیما دكەڤیتە د ڤێ ڕێزێ دا دێ یارییەكا ڤەبر دگەل یانەیا خودانا ڕێزا سێیێ یا خولا پلا نایاب كەت ژبۆ كورسیكا خولا ستێرێن ئیراقێ.
