هەتا نوكە ب رێكا من (6) كارگەهێن چێكرنا نانێ تەنكی هاتینە ڤەكرن
عەیشا عەجیب
سهام محەمەد خالد، خانمەكا خەلكا دهۆكێ یە، خودانا (ناپێژی و خوارنگەها دایكا نیژینێ) یە، د دیدارەكێ دا بۆ رۆژنامەیا ئەڤرۆ دبێژیت: ئەڤە هەشت سالن ئەز خوارنێن كوردی چێدكەم و نانێ تەنكی دپێژم، ل دەستپێكێ ئەزا بتنێ بووم، لێ پشتی كارێ مە بەرفرەه بووی نوكە ئەم (8) كەس لڤی جهی كاردكەین و ئەز گەلەك ب كارێ خۆ یا سەربلندم.
هەروەسا گۆت: هەتا نوكە ب رێكامن (6) كارگەهێن چێكرنا نانێ تەنكی هاتینە ڤەكرن و ئەڤێ چەندێ وێرەكی بۆ چەند كچ و ژنان پەیداكریە كو ئەو ژی بچن ڤان كارگەهان ڤەكەن، د پلانا من دایە كارگەهەكێ ل پارێزگەها سلێمانیێ ژی ڤەكەم، چنكو گەلەك داخوزایێن نانی و خوارنان بۆ مە ژ وێرێ دهێن وە من دڤێت سوپاسیا خێزانا خۆ بكەم، چنكو هەكە ب پشتەڤانیا وان نەبا ئەز نەشیام ڤی كاری بكەم، یان یا بەردەوامبم، یا من دڤێت بێژم پێدڤیە ژن یا خۆڕاگر بیت و هاریكاربیت بو مالا خۆ، ژبەركو نوكە ژیان یا ب زەحمەتە و دبێژمە وان كاربكەن و نەترس، دێ ب سەركەڤن.
