فلمێ (باول) دیارییا جەژنێ یە
رەمەزان زەكەریا
بڕیارە د رۆژێن جەژنا قوربانێ دا فلمەكێ نوو یێ سینەمایی ب ناڤێ (باول) كو د قالبێ كۆمیدیا رەش دایە ل هۆلێن سینەمایێ ل چەندین باژێڕێن هەرێما كوردستانێ بهێتە نیشادان.
دیاكۆ بایز، نڤیسەر و دەرهێنەرێ وی فلمی بۆ رۆژنامەیا ئەڤرۆ گۆت: دەمێ فلمی(90) خولەكن و هژمارەكا ئەكتەرێن خودان ئەزموون و ناڤدارێن باژێڕێ سلێمانیێ رۆلی تێدا دگێڕن، ژوانا (ژیان ئیبراهیم خەیات، ئاكۆ سەنگاوی، زاهیر جەلال، زاهیر غەریب، كەیوان سەلاحەدین، ئیدریس شەوكەت، نبراس جاف، زانست بەرزنجی، یاسین عومەر) و گەلەكێن دی، چیرۆكا فلمی بەحسی ژیانا گەنجەكێ دكەت كو چ جاران ناڤ باژێڕ نە دیتیە و ژ جیهانا دەرڤە دوور كەفتیە، ژیانا ڤی گەنجی گەلەك ب ئارامی و دوور ژ قەرەبالغیا جادە و باژێڕی دەرباز دبیت پشتی مرنا داپیرا خۆ وەسیەتنامەیەك دكەڤیتە دەستێن وی كو هەموو ژیانا وی سەرو بن دكەت، د ناڤ وێ وەسیەتنامەیێ دا ئەو گەنجە دزانیت كو بابێ وی هێشتا یێ ساخە و ل ناڤ باژێڕی دژیت ئەڤ ڕاستیە دبیتە پالدەر كو بۆ جارا ئێكێ بڕیارێ بدەت بچیتە ناڤ باژێڕی و خێزانا خۆ بگەڕیێت و گەهشتنا ب خێزانێ یا ب ساناهی نابیت چونكو د ڕێیا خۆ دا تووشی چەندین كێشە و ئاستەنگ و ململانێیێن جودا یێن دەرڤە و ناخێ خۆ دبیت.
