محەمەد مفتن: یارییا پادل یا نوویە و هەر زوو جهێ خوە د ناڤ وەرزشێ دا كریە
د داخویانیەكێ دا محەمەد مفتن سەرۆكێ فدراسیۆنا یارییا پادل دیاركر وان پێشبنی نە دكر بلەز دێ ئەڤ یارییە بەلاڤبیت و دەستخوەشیا وەرزشڤانێن پارێزگەها دهۆكێ كرن كو هاریكاربوون بۆ پشكدارییا وان د ئێكەم قارەمانی دا.
زێدەتر ناڤهاتی گۆت: یارییا پادل ئێك ژ نووترین یارییانە ل جیهانێ و ئیراقێ كو شێوازێ یارییا وێ پێكهاتیە ژ ستایلێ یارییا تێنسا ئەردی و ئسكۆاشێ یە، یاریێن وێ ب شێوەیێ جود دهێتە كرن كو ل سەر ئاستێ جیهانێ پووتەدانەكا مەزن بۆ دهێتە كرن، لەوما ژی مە ل ئیراقێ فدراسیۆنەك ڤەكر ب پشتەڤانییا لژنەیا ئۆلمپیی و دهێتە پێشبینیكرن د وەرزێ ئەڤ سالە دا چالاكیێن باش بهێنە كرن هەر ژ كوردستانێ هەتا دگەهیتە باشۆرێ ئیراقێ.
هەروەسان ناڤهاتی گۆت: ئەڤ یارییە تایبەتمەندیا خوە هەیە و گرنگییەكا تایبەت ژی بۆ دهێتە دان ژلایێ وەرزشڤانان تایبەت ئەو یاریزانێن تێنسا ئەردی و ئسكۆاشێ ژبەركو نێزیكی یاریێن وانە، بتنێ تەپە و دەستك جوداهینە دگەل كۆمەكا یاسایێن نوو، بۆ مە گرنگ ئەوە بشێن ڤێ یاریێ بەلاڤبكەین، ئێكەم قارەمانییا مە بەری دو حەفتیان بوو و كچێن دهۆكێَ شیابوون ببنە قارەمان ئەڤە ژی ڕامانا وێ ددەت ل دهۆكێ یاریزانێن باش هەنە و دهێتە پێشبینیكرن ئەڤ یارییە زووتر ژ گەلەك یاریێن دی بەلاڤ بیت و حەز ڤیانا خوە ل دەڤ وەرزشڤانان پەیدا دكەت.
