مۆزیك ژحەزەكا سادە بۆ تێگەهشتنەكا زانستی
هیڤی كەریم
مۆزیكژەن (ئازەر جەلال) كو نوكە فوتابیێ فوناغا دویێ یە ل پشكا مۆزیكێ ل كولیژا هونەرێن جوان ل زانكۆیا دهۆك، د دیدارەكێ دا بۆ رۆژنامەیا ئەڤرۆ گۆت: ئەز دناڤ مۆزیكێ دا مەزن بوویمە، بابێ من ژەنیارێ سازێ یە و ئەو بو ئەگەر كو ئەز ژی دەست ب ژەنینا سازێ بكەم و دژیێ (18) سالیێ دا من دەستپێكر، پاشان ئەز بوومە ژەنیار دگەل تیپا لاوان ل ناڤەند وەرزش و لاوان ل دهۆكێ.
هەروەسا گۆت: خالا وەرچەرخانێ بۆ من ئەو بوو دەمێ ئەز ل كولیژا هونەرێن جوان هاتیمە وەرگرتن و ئەڤێ چەندێ ئەز ژ ژەنینا گوهی و كولانكی بەرەف جیهانا زانستی برم، كو مۆزیكێ ب شێوەیەكێ ئەكادیم بخوینم و مۆزیك ژحەزەكا سادە بۆ تێگەهشتنەكا زانستی، هەر چەندە ئەز ب باوەرم كو مۆزیك بتنێ ژەنین و كەیفخۆشی نینە، بەلكو پەیامەكا جیهانی یا مرۆڤاتیە، ئەركێ مە یێ ئەخلاقی و هونەری ئەوە كو گەنجان فێری مۆزیكا رەسەن بكەین، ئەز ب رێكا سۆشیال مەدیایێ ژی هەول ددەم كو ناڤەرۆكا پەروەردەیی بگەهینمە هەموو حەزژێكەرێن مۆزیكێ.
