فیستەڤالا پێنجێ یا فلمێن كوردی ل هۆلەندا هاتە گێڕان
زنار تۆڤی
فیستیڤالا پێنجێ یا فلمێن كوردی ل ژێر ناڤێ (د ناڤبەرا نەریت و گوهۆرینێ دا) ل وەلاتێ هۆلەندا ل باژێرێ ئەمستەردام هاتە گێڕان.
ئاری كەریم، پەیڤدارێ فیستیڤالێ دیاركر: گەڕا پێنجێ یا فیستیڤالا فلمێن كوردی ل ئەمستەردام، وەك هەڤڕكیەكا سینەمایی یا مەزن و هەڤشێوێ فیستیڤالێن نێڤدەولەتی یێن گشتی بۆ خەلاتێن جودا هاتبوو ریكخستن، بەلكو سەرنجا سەرەكی یا ڤێ فیستیڤالێ ل سەر نیشادان، دیالۆگ و كۆمكرنا سینەماكاران بوو، نەك هەڤڕكیا پشكێن جودا.
ناڤهاتی گۆت: خەلاتێ ئەكادیمیا فیستیڤالێ، كو ب تنێ ئێك خەلاتێ فەرمی بوو، هاتە بەخشین بۆ دەرهێنەر (لانیە نورەددین) بۆ كورتە فلمێ (ل ژێر) ئەڤە ژی وەك رێزلێنانەك بوو بۆ كوالێتی و پەیاما فلمی كو بەحسێ جینۆساید و ژێبرنا دیرۆكێ و بیرەوەرییا دكەت، ب رێیا دیدارەكا بێدەنگ د ناڤبەرا دو زەلامان دا، كو تێدا سروشت و دەوروبەر ب خۆ دبنە شاهد ل سەر روودانان، پشتی نیشادانا فلمان، دەم بۆ دەرهێنەر و ستافێ فلمان هاتە تەرخانكرن بۆ گەنگەشەكرنێ ل گەل بینەران، كو ئەڤە ب خۆ وەك رێزلێنان و ناساندنا كارێن وان دهاتە نیاسین، ب شێوەكێ گشتی د ڤێ فیستیڤالێ دا، هەموو ئەو دەرهێنەر و فلمێن هاتینە وەرگرتن، باوەرنامەكا فەرمی یا فیستیڤالێ پێشكێشی وان هاتە كرن ب هەلكەفتا هەلبژارتنا فلمێن وان د بەرنامێ فەرمی دا، فیستیڤال ب تنێ ب فلمان ب دووماهی نەهات، بەلكو چالاكیێن رەوشەنبیری، مۆزیك و دیدارێن هونەری هەبوون، داكو فیستیڤال ببیتە جهەكێ زیندی بۆ ئێكگرتنا جڤاكێ كوردی و دۆستێن هونەری.
