ژنا كورد پشكەكا گرنگە ژ میرات و كلتورێ كوردستانێ
دلڤین رەشید:
ژنەكا دەستڕەنگین ب ناڤێ (ئەڤسانە محمد سالح) د دیدارەكێ دا بۆ رۆژنامەیا ئەڤرۆ دیاركر كو ئەو خەلكا رۆژهەلاتێ كوردستانێ یە دەرچویا زانكویێ یە پشكا دەرونناسێ، ئەڤە بۆ ماوەكێ حەفت سالانە ل هەرێما كوردستانێ دژیت و نوكە وەك ژنەكا دەستڕەنگین كاردكەت و ژیانا خۆ پێ دەرباز دكەت و ئەڤ كارە ئێك ژ حەز و ئارازوێن وێ بوو و هەتا نوكە پشكداری د هژمارەكا فیستیڤالان دا كریە.
ناڤهاتیێ گۆت: ژنا كورد ددیرۆكێ دا رۆلەكی گرنگ هەبوویە د پاراستن و گەشەپێدانا كارێ دەستی و كلتۆرێ كوردی، راستە دقوناغا نوكە دا كارێ دەستی ژێدەرەكە ژ بۆ پەیدا كرنا داهاتیەكی ژ بۆ ژیانا من و خێزانا من ، بەلێ دهەمان دەمێ دا دخوازم ببیتە رێكەك ژ بۆ پاراستنا ناسنامە و داب و نەیتێن مە یێن كوردەواری، چونكی ژنا كورد خودان هێز و بەهرەیەكا كاریگەرە دپاراستنا فولكۆر و كلتۆر و فێركرنا نڤشێ نوو، پشكداریكرن د بازاڕ و پرۆژەیان دا، سەرە رای كێمیا پشتەڤانیا داریی و نەبوونا بازاڕێن گونجایی و ئاریشەیا هنارتنا بەرهەمان بۆ دەرڤە، لێ ئەم وەك ژن دێ بزاڤێ كەین دبەردەوام بین دكارێ خودا و كارێ دەستی یێ ژنا كورد پشكەكا گرنگە ژ میرات و كلتۆرێ كوردستانێ، لەورا پێدڤیە رێكخراوا و جهێن پەیوەندیدار پشتەڤانیا ژنێن دەستڕەنگین و خودان بەهرە بكەن داكو بشێن بەرهەمێن خۆ بەلاڤ بكەن و داهاتیەكی باشتر ب دەست خۆڤە بینن.