كچەكا كورد د ناڤ ئۆركێسترایێن ئەلمانیا دا مۆزیكێ دژەنیت
زنار تۆڤی
مۆزیكژەن (نورە دلۆڤانی) د دیدارەكێ دا بۆ رۆژنامەیا ئەڤرۆ گۆت: ئەز خەلكا ئەرمەنستانێ مە، ل باژێرێ ئێریڤانێ ژ دایك بوویمە و دناڤ مالبەتەكا هونەری دا مەزن بوویمە، باپیرێ من رەشیدێ باسۆ، دەنگبێژێ رادیۆیا ئێریڤانێ بوو، هەروەسا بابێ من ژی سترانبێژە و ئەو بوونە رێخۆشكەر كو ئەز ژی بهێمە دناڤ هونەری دا.
هەروەسا گۆت: ئەز ئامیرێ كەمانێ و پیانۆیێ دژەنم، برایێ من (رەشۆ) ئامیرێن مەی و زۆرنایێ دژەنیت، ئەز نوكە ل وەلاتێ ئەلمانیا دژیم و من ل سەر مۆزیكا كلاسیك یا جیهانی خواندیە و ئەز دناڤ ئۆركێسترایێن ئەلمانیا دا مۆزیكێ دژەنم، هەروەسا دناڤ یێن كوردی ژی دا موزیكێ دژەنم، من كار ل گەل گەلەك هونەرمەندێن كوردان ژی كریە، هەروەسا ل زانكۆیا كۆلن ل پشكا مۆزیكێ ئەز وانەیان ژی دبێژم و مۆزیكا كوردی بۆ من گەلەك گرنگیا خۆ هەیە، ژبەركو ئەز كوردم، بەلێ د بۆارێ خواندنا مۆزیكێ دا، پێدڤیە ئەم كورد خۆ باشتر پێشبێخین، لێ دڤێت ئەم مۆزیكا خۆ یا رەسەن و سترانێن خۆ یێن فولكلۆری ژی ژبیر نەكەین، دڤێت زێدەتر ئەم گرنگیێ پێ بدەین و د نوكە دا مە مۆزیكژەنێن باش هەنە، بەلێ هندی هەبن، بۆ مە باشترە، داكو ئەم مۆزیكا كوردی پێشبێخین و پتر ل جیهانێ بدەینە نیاسین.
