كیژانێ كلیپا خۆشمژدە بەلاڤكر
زنار تۆڤی
خانما سترانبێژ (كیژان ئیبراهیم خەیات) نووترین بەرهەمێ خۆ یێ هونەری ب ناڤێ (خۆشمژدە) ب شێوێ ڤیدیۆ كلیپ بەلاڤكر و پێشوازیەكا باش لێ هاتە كرن.
كیژانێ دیاركر: ئەڤ سترانە ژ هەلبژارتنا هەلبەستڤانێ ناڤدارێ كورد سالح بیچارەیە، ئاوازا ڤێ سترانێ ژلایێ من ب خۆ ڤە هاتیە دانان، بژار دیلان ب كارێ ئامادەكرن و دابەشكرنا مۆزیكێ رابوویە، هەروەسا ستیڤان كاول كارێ دەرهێنانا ڤێ ڤیدیۆ كلیپێ كریە، سترانا خۆشمژدە، د دەمێ چەند هەیڤێن بۆری دا هاتیە ئامادەكرن و تیما كاری ل سەر هەموو هووركاریێن بەرهەمی ب رەنگەكێ كوور و پرۆفیشنال كار كریە، ئەڤ سترانا من یا جودایە ژ هندەك بەرهەمێن من یێن پێشتر، چونكی خودان ریتمەكێ بلەز و شیانەكا بلندا هەستی تێدا هەیە و من بزاڤكریە روویەكێ شاد پێشكێشی گۆهداران بكەم، ئەڤ بەرهەمە سترانەكا شادە و ژێدەرێ وێ ژ دلێ بهارێ یە، من دخواست كارەكێ پێشكێش بكەم كو بشێت هەستێ خۆشی و گەشبینیێ بۆ گۆهداران ڤەگوهێزیت، ئەڤە جارا ئێكێ یە ئەز سترانەكێ دبێژم كو ئەڤ جۆرە ریتم و شیانە تێدا هەبن.
كیژان ئیبراهیم خەیات، ل سالا 1985 ل باژێرێ سلێمانیێ ژ دایكبوویە، چەندین ئەلبۆم و ستران و ڤیدیۆ كلیپ هەنە، هەروەسا پشكداری دچەندین فیستەڤال و كۆنسێرتێن ناڤخۆیی و دەرڤەی وەلاتی دا كریە.
