من سترانێن نوو هەنە و ئەز پێدڤی ب پشتەڤانیێ مە
شاكر ئەتروشی:
سترانبێژ (رۆژ كۆبانی) كو خەلكا رۆژئاڤایێ كوردستانێ یە، لێ ئەڤە (10) سالن وەك پەنابەر ل كەمپەكا ئاوەریان ل سنۆرێ پارێزگەها دهۆكێ دژیت، د دیدارەكێ دا بۆ رۆژنامەیا ئەڤرۆ گۆت: دەمێ ئەز ل باژێرێ خۆ ل (كۆبانێ) دژیەكێ بچووك دا حەزا سترانگۆتنێ ل دەف من هەبوو، دەمێ من ستران بۆ مالباتا خۆ یان هەڤال و دوستێن خۆ دگۆتن وان دگۆتنە من دەنگێ تە یێ خۆشە و دڤێت یا بەردەوامبی، لێ ژبەركو ل وی دەمی كەس نەبوو رێكا دروست نیشا من بدەت من ب گۆتنا سترانێن (عەرەبی) دەستپێكر، لێ پشتی ل سالا 2016 ئەز هاتیمە كەمپەكا سنۆرێ پارێزگەها دهۆكێ گەلەك دەرگەه بۆ من ڤەبوون، هەروەسا گەلەك سترانبێژ و مۆزیكژەنان هاریكاریا من كرن و نوكە ئەز سترانان ب زمانێ خۆ یێ كوردی دبێژم.
هەروەسا گۆت: ل ڤێرە من پشكداری د گەلەك ئاهەنگ و فیستەڤالان دا، هەروەسا گەلەك بەرنامەیێن رادیۆ و تەلەفزیۆنان دا كریە، هەروەسا من ب خۆ ژی چەند ستران هەنە د ئامادەنە بۆ تۆماركرن و كللیپكرنێ، لێ ژبەركو ئەز وەك ئاوارە ل ڤێرە دژیم بۆ من یا ب زەحمەتە گۆژمەكێ مەزن ل تۆماركرنا سترانەكێ یان چێكرنا كلیپەكێ بمەزێخم، لێ هەكە پشتەڤان یان سپۆنسەر هەبوون ئەز نوكە یا بەرهەڤم و دێ دەستپێكەم، بۆ زانین ل ڤێرە مە سەندیكا هونەرمەندێن رۆژئاڤایێ كوردستانێ هەیە و هونەرمەند (ئەحمەد شۆێش) و چەند هەڤالێن دی ب رێڤەدبەن، مە دگەل وانژی هندەك چالاكی و پشكداری هەنە، لێ سەندیكا مە ژی پتر پێدڤی ب پشتەڤانیا دارایی یە دا بشێت بەرهەمێن باش چێكەت.
