شێوەكارەكێ كورد دێ پێشانگەهەكێ ل رۆمانیا ڤەكەت
زنار تۆڤی
شێوەكار و نڤیسەر (حەمە هاشم) د دیدارەكێ دا بۆ رۆژنامەیا ئەڤرۆ گۆت: ئەڤە دەمەكە ئەز خۆ بۆ ڤەكرنا پێشانگەهەكا تایبەت ئامادە دكەم، ئەو پێشانگەهە ل ژێر ناڤێ (رۆخسارێن پشتی شەڕی) ل (رێپێراج گەلەری، بۆ هونەری) ل ئێڤاریا رۆژا 27 خزیرانا 2026 ێ، ب رەنگەكێ فەرمی دێ هێتە ڤەكرن و بۆ ماوێ دو هەیڤان دێ یا بەردەوام بیت، ئەڤ پێشانگەهە ب داخوازناما فەرمی یا ئێكەتیا هونەرمەندێن شێوەكاری یێن رۆمانی و ب سەرپەرشتیا راستەوخۆ یا جڤاتا شارەوانیا ئۆرادیا هاتیە رێكخستن، كو ژلایێ هونەرمەند و رەخنەگرێ ناسیار د. ڤیۆرا بارا ڤە كار رێكخستنێ بۆ هاتیە كرن.
هەروەسا گۆت: د وێ پێشانگەهێ دا، نێزیكی 52 كەڤال و بەرهەمێن من یێن نوو دێ هێنە نیشادان، كو هەموو ب تەكنیكا ئەكریلیك ل سەر كانڤاسی هاتینە كێشان، هەروەسا پشكەك ژ وان كەڤالان ب قەبارەكێ مەزن هاتینە چێكرن و درێژاهیا وان ژ سێ مەتران دەرباز دبیت، دیسان ب رێیا ڤان بەرهەمان، من ب دیتنەكا ئەكسپرێسیۆنیستی، بەحسێ وان كارتێكرن و وێرانكاریان كریە یێن كو ژ بەرهەمێ شەڕی و نەخۆشیان روو ل جیهانێ ب گشتی و هەرێما كوردستانێ ب تایبەتی كرین، تەوەرێ سەرەكی یێ وان كاران ژی، گەهاندنا پەیاما ئازادی و رۆمەت و سەربەخۆیا مرۆڤی یە، كو ب رێیا زمان و رەنگێن هونەری یە.
