ئوونداڤ شانازیا كوردانە د مۆندیالێ دا
ئیحسان حەسەن
شیان و پێچێبوونێن وەرزشڤانێن كورد ل هەر جهەكێ دبێ سنوورن، ئەڤرۆ وەرزشڤانەكێ دی یێ كوردستانێ شیایە جوانترین وێنەیێن قارەمانییێ و زیرەكییێ نیشا هەموو جیهانێ بدەت و دیرۆكەكا نوو تۆماربكەت، ب سەلمینیت كو پێچێبونێن تاكێ كورد دمەیدانێن دەولەتی دا چ سنوور و ئاستەنگێن جوگرافی و سیاسی نانیاسن، ئەوژی یاریزانێ كورد هێرشبەرێ هەلبژارتییێ ئەلمانیا دەنیز ئوونداڤە ئەوێ لڤێ داویێ لسەر ئەنجامێ زیرەكی و چەلەنگییا وی بوویە ناڤەكێ دیار ل ئەسمانێ فوتبۆلا جیهانی دا، چ وەكو یاریزان د دبۆندسلیگایا ئەلمانی دا، دیسان دمۆندیالا 2026ێدا، ئەوا نها هەڤركیێن وێ ل ئەمریكا ب هەڤپشكی دگەل مەكسیك و كەندا دهێنە برێڤەبرن، ئەڤرۆكە بوویە سیمبولەكێ راستەقینە یێ شانازیا نەتەوەیی بۆ گەنجێن كورد ل سەرانسەری جیهانێ، ژبلی هندێ چەكەكێ تەكتیكی بۆ هەلبژارتیێ مانشافت ژبۆ ڤەگەراندنا ئەنجامێ تیمێ ل هەر دەمێ پێدڤی، دیسان تۆماركرنا سەركەڤتنان و گۆلان ژبەر شیانێن وی یێن تەكنیكی یێ بلند، دیسان دروستكرنا بوشاییان بۆ هێلا ناڤەراست و لایێن هێرشبەریی، هەروەسا شیانێن وی یێن كونترۆلكرنا تەپێ لبن فشارێن دژوار و ململانیێن جەستەیی، راوەستاندنا وی ل جهێ دروست د ناڤا دەڤەرا پەنەلتییێ دا و هێزا پێن لێدانا تەپێ ب هەردوو پیان، كو بڤێ چەندێ مەترسییەكا بەردەوام لسەر هێلا بەرگیرییا هەموو تیمێن هەڤرك دروست كریە، باشترین و مەزنترین بەلگە شیان و ئاستێ وێ یێ بلند د تۆماركرنا سێ گۆلان و دوو ئەسێستان دهەردوو یاریێن تیما خوە وەكو یاریزانەكێ پێكهۆر دمۆندیالێ دا، ئەڤ ئامارە ئوونداڤی وەكو باشترینێ دیرۆكا مۆندیالێ دەستنیشاندكەت، ژبەر كو دكێمترین خولەك دا شیا ئەنجامێ یاریێ ب شێوەیەكێ دراماتیكی د بەرژوەندیا ئەلمانیا دا ب تایبەت دیاریا دووێدا ئێكلا بكەت، ئەوا ناڤێ ستێرا كورد پتر گەش دكەت، نەتنێ ئاستێ وی یە، بەلكو هەلویستێن وی یێن نەگۆرن كو دهەموو دیدار و چاڤپێكەڤتنێن خوەدا شانازیێ ب رەه و ریشالێن خوە یێن كوردی دبەت، ئامادە نینە دەستبەرداری ماف یان پرنسیپێن خوە ببیت، رەتكرنا داخوازیا فیدراسیونا توركیا بۆ یاریكرنێ د ناڤ رێزێن هەلبژارتیێ وێ دا، باشترین راستی یە كو وی نەڤیا ببیتە بەشەك ژ سیستەمەكی كو دان پێدانێ ب گەلێ وی ناكەت، ژبلی هندێ كاریگەریا وی د ناڤا جیهانا فوتبۆلێ دا دێ وەكەت كو نفشێن پاشەرۆژێ ل كوردستانێ باوەربكەن كو چ جوداهی د ناڤبەرا شیانێن وان و چ نەتەوەیێن دی نینن، بەلكو تنێ پێدڤی ب دەرفەت و كاركرنا بەردەوام و باوەری بخۆبوونێ هەیە، بەلێ هەر دێ مینیت لایی هەر جوان و سەرانجراكێش دكەسایەتییا وی دا، نیشاندانا دەهواتا كوردی یە، پشتی هەر گۆلەكا تۆمار دكەت، ئەڤ دیمەنە بوویە ئەگەرێ هندێ كو كەلتور و رەسەنایەتیا كوردی بفەرمی و ل بەر چاڤێن ملیونان بینەرێن جیهانێ بهێتە ناسناندن، دیسان ببیتە پەیامەك كومرۆڤ چەند بلند ببیت و بگەهیتە گوپیتكا ناڤ و دەنگییێ، نابیت كەلتورێ باب و باپیران ژبیر بكەت، دیسان بەلگەیەكێ زیندی یە كو سنوورێن سیاسی و نەبوونا دەولەتی چ جاران نەشێن ببنە رێگر ل بەرامبەر شیانێن مرۆڤێ كورد، هەر ئەڤە یە یا كو پێدڤییە ژ هەموو وەرزشڤانێن كورد دهێتە خواستن.
