داعش دخواست ڤى جهێ كوردستانێ كونترۆل بكه‌ت
ئەڤرۆ نیۆز، قائید میرۆ:
شەڤا بۆری ھێزێن پێشمەرگەی ل ناحیا گوێڕ یا باشورێ رۆژئاڤایێ ھەولێرێ ھێرشەکا داعش شکاند و فەرماندەکێ پێشمەرگەیژی دبێژیت، داعش دخواست بلنداھیێن کۆشاف کۆنتڕۆلبکەت.
عەلی چەمچەمالی، فەرماندێ پێشمەرگەی ل میحوەرێ گوێڕ بۆ ئەڤرۆ نیۆز گۆت: “دەمژمێر 11:30 شەڤا بۆری، چەکدارێن داعش ل گوندێ ساقیە یێ دکەڤیتە بەرامبەر ناحیا گوێڕ ھێرشکرە سەر ھێزێن پێشمەرگەی ل ھەردو گوندێن کۆشافا مەزن و کۆشافا بچووک، ھەتا دەمژمێر نێزیکی ئێکی شەڤێ شەڕ یێ بەردەوامبوو، بەلێ ھێزێن پێشمەرگەی شیان ھێرشا داعش بشکێنن و نەچاربن پاشڤەبچن”.
عەلی چەمچەمالی گۆتژی: “مەرەما داعش ل شەڤا بۆری ئەوبوو، بلنداھیێن کۆشاف کۆنتڕۆلبکەت، ژ بەر کو جھەکێ ستراتیژیە ل دەڤەرێ و پێشمەرگە د شەڕێ شڤێدى دا یێ بێ زیانبوو، بەلێ ژ بەر کو شەڤبوو زیانێن داعش نەھاتینە زانین و بێگومان زیان ھەبووینە”.