پێدڤییە دۆزا گەلێ كوردستانێ ب شێوازەكێ سەردەمیانە و ئاشتیانە بهێتە چارەسەركرن
ل پیرمام سەرۆك مەسعود بارزانی پێشوازی ل سەردار یوكسەل، ئەندامێ پەرلەمانێ ئەلمانیایێ كر.
د دیدارەكێ دا سەرۆك بارزانی ب گەرمی ب خێرهاتنا سەردار یوكسەل كر و خۆشحالییا خۆ راگەهاند كو گەنجەكێ كورد شیایە رۆلێ خۆ ل ناڤەندێن سیاسی و پەرلەمانی یێن ئەلمانیایێ هەبیت و دەستخۆشی ل بزاڤ و وەستیانێن وی كر ل بوارێن جودا و بەرگریكرن ل دۆزا كوردی و پەنابەران ل ئەلمانیایێ دیسان سەرۆك بارزانی سەرەرای ئاماژەدان ب بنەما و پرەنسیپێن خەباتا رزگاریخوازا گەلێ كوردستانێ دوپاتی ل سەر ئاشتیبوونا دۆزا گەلێ كوردستانێ كر كو دڤێت كێشەیا گەلێ كورد ل رۆژهەلاتا ناڤین ب رێكا ئاشتیێ و دیالۆگێ و ب شێوازەكێ سەردەمیانە چارەسەر ببیت.
هەر د وێ دیدارێ دا سەردار یوكسەل پێزانین بۆ رۆلێ دیرۆكیێ سەرۆك بارزانی ل ئازادیخوازی و خەباتا گەلێ كوردستانێ و هەروەسا شەڕێ دژی تیرۆرێ و پشتەڤانیكرنا دۆزا كوردی ل رۆژئاڤا هەبوون و دیار كر كو ل ئەلمانیایێ و گەلەك جهێن دی یێن جیهانێ خەلكێ دۆست و پشتەڤان و هەڤسۆز بۆ مافێن گەلێ كوردستانێ هەنە.
سەردار یوكسەل ئەزموونا هەرێما كوردستانێ ب بلند و بهادار ل قەلەم دا كو پێدڤییە پشتەڤانی لێ بهێتە كرن هەروەسا پێزانین ژی بۆ رۆلێ دەزگەهێ خێرخوازیێ بارزانی هەبوون ل هاریكاری و هەڤكاریكرنا لێقەومایان و ئاوارە و پەنابەران.
بارودۆخێ سیاسی و دووماهی گوهۆرینێن ئاستێ دەڤەرێ و گەفێن تیرۆرێ تەوەرێن دی یێن وێ دیدارێ بوون.
