دلێن مە سنۆرێن دوژمنان شكاندن
لەیلا ئەسكەندەر
ئەگەر ئەم تەماشەی مێژوویا خۆ بكەین، دێ بینین كو مللەتێ كورد وەك وێ داڕا بەڕوویێ یە یا كو ل سەر چیایێن كوردستانێ شین بووی؛ هەر چەند با و باڕۆڤە لێ بدەن، ئەو ب هێزتر لێ دهێت و ڕهێن وێ كویرتر دچنە ناڤ ئەردی. كوردایەتی ل دەڤ مە نە بتنێ ناڤەكە، بەلكو هەستەكێ پیرۆزە كو مە هەمییان ل دۆر ئێك كۆم دكەت.
كوردستان ل سەر نەخشێ جیهانێ هاتیە پارچەكرن، بەلێ دلێ كوردان چ جاران پارچە نەبوویە. دەمێ ل هەر پارچەكا كوردستانێ ئیشەك یان برینەك پەیدا دبیت، هەمی كورد پێ دئیشن. ئەڤە ئەو «هەستێ نەتەوەیی» یە كو سنوورێن دەستكرد نەشیاینە ژ ناڤ ببەن. ژ زاخۆ هەتا خانەقین، ژ مەهاباد هەتا قامیشلۆ و ئامەدێ، ئەم هەمی خۆدان ئێك مێژوو ئێك دەرد و ئێك ئارمانجین.
ئەڤرۆ جیهان د ناڤ گوهۆڕینێن مەزن دا دەرباز دبیت. ڕۆژهەلاتا ناڤەڕاست یا دهێتە لێكدان و دوبارە ڕێكخستن. د ناڤ ڤێ ڕۆژەڤا نوكە دا، تاكێ كورد ژ هەر دەمەكی هشیارتر لێ هاتیە. ئێدی مرۆڤێ كورد ب تنێ ل سنوورێ باژێرێ خۆ یان پارچەیا خۆ نا سەحكەت، بەلكو چاڤێ وی ل سەر دەستكەفت و قوربانیێن هەر چار پارچەیانە. ئەڤ هشیارییە مەزنترین چەكێ مەیە؛ چونكی دوژمنان هەردەم دڤیا مە ژ ئێك دویر بكەن و داببڕن، لێ تەكنولۆژیا و هشیاریا نەتەوەیی ئەڤرۆ هەمی كورد كرینە ئێك خێزان.
هەستا تاكێ كورد ل بەرانبەر ئازادیێ، هەستەكا بێ وێنەیە. هەر كوردەك ل ناڤ دلێ خۆ دا دزانیت كو ئازادیا ڕاستەقینە ب تنێ ل پارچەیەكێ ب دوماهی ناهێت، بەلكو بەختەوەریا مە ب تەمامی ب ئازادیا هەر چار پارچەیێن كوردستانێ ڤە گرێدایە. ئەڤ خەونە نە تنێ درووشمە، بەلكو بوویە هێڤێنێ ژیانا مە. گەنجێ كوردێ ئەڤرۆ، خەونا وی ئەوە كو بێی پاسپۆرت و بێی سنوورێن دەستكرد، سەرەدانا هەمی چیا و باژێرێن كوردستانێ بكەت. ئەڤ ئیرادەیە، كلیلا سەركەفتنا مە یا داهاتی یە.
ئەوا مە وەك نەتەوە هەتا ئەڤرۆ پاراستی، زمانێ مە یێ شرین و داب و نەریتێن مە یێن ڕەسەن بووینە. د هەر قووناغەكا تاری دا، دایكا كورد ب لایەلایێن خوە و نڤیسەرێن مە ب پێنووسێن خوە، كوردایەتی د دلێ نفشێن نوی دا چاندیە. هەر پەیڤەكا كوردی كو ئەم دئاخڤین و هەر جەژنەكا نەتەوەیی كو ئەم پیرۆز دكەین، سەنگەرەكێ ب هێزە بۆ پاراستنا ناسنامەیا مە. نەتەوەیەكێ خۆ ب زمان و فەرهەنگا خوە بگریت، چ جاران بەرزە نابیت.
پێگەهێ كوردستانێ نوكە ل سەر ئاستێ جیهانێ یێ گرنگە، لێ ئەوا مە دگەهینیتە كنارێن سەرفەرازیێ، تنێ «تەبایی و ئێكڕێزی» یە. پێدڤیە ئەم هەمی ببینە ئێك دەنگ و ئێك دەست، چونكی هێزا مە د ئێكبوونا مە دا یە. كوردایەتی و نەتەوەبوون دڤێت ژ حزبایەتیێ و دەڤەرداریێ مەزنتر بن. چونكی ئەوا مە كۆم دكەت ئەوە كو ئەم هەمی خودان ئێك ئاخ و ئێك ناسنامەینە، نە بەرژەوەندیێن كێم و كورت.
كوردایەتی تنێ ب پەیڤێن جوان و درووشمێن بلند ناهێتەكرن؛ بەلكو كوردایەتییا ڕاست و دروست ئەوە كو د ڕەفتار و كارێن مە یێن ڕۆژانە دا ڕەنگڤەبدەت. دەمێ ئەم خزمەتا ئاخا خۆ دكەین، دەمێ ئەم پشتەڤانییا بەرهەمێ نەتەوەیی دكەین و دەمێ ئەم ڕێزێ ل یاسایێن وەڵاتێ خۆ دگرین، ئەڤە ب خۆ كوردایەتییە.
هەبوون و مانا كوردایەتیێ ب دو ڕێیان یا بەردەوامە: ئێك، ب گەشكرنا ئاگرێ نەورۆزێ كو نیشانا هێز و پشتبەستنا مەیە ب مێژوویا خۆ. دو، ب پاراستنا زمانێ كوردی؛ چونكو هەتا زمانێ مە یێ زیندی بیت و د سەر زمانێن دی ڕا بیت، ناسنامەیا مە ژی دێ یا پاراستی بیت. ئەم مللەتەكین كو مێژوویێ گەلەك ئیش و ئازار ب سەرێ مە ئیناینە، لێ مەزنترین تایبەتمەندییا مە ئەوە كو مە ژ وان برینان هێز و ئیرادە چێكریە. ئەڤ خۆڕاگرییە و ئەڤ وەفادارییا بۆ ئاخێ، مەزنترین شانازییە بۆ هەر كوردەكی كو ب ڕاستی دلێ وی بۆ نەتەوا وی لێ بدەت.
