سەرۆك بارزانی و رادۆ بۆتۆم مەترسی و دەلیڤەیێن ل هەمبەر ئیراقێ و دەڤەرێ گەنگەشە كرن
سەرۆك مەسعود بارزانی پێشوازی ل بەرێز ڕادۆ بۆتۆم، بەرپرسێ نڤیسینگەها پەیوەندییێن ئێكەتییا ئۆرۆپا ل هەرێما كوردستانێ كر.
د دیدارێ دا، بەرپرسێ نڤیسینگەها پەیوەندییێن ئێكەتییا ئۆرۆپا ل هەرێما كوردستانێ، یێ كو ب هەلكەفتا ب دووماهی هاتنا ئەركێن وی و مالئاڤاییكرنێ سەرەدانا سەرۆك بارزانی كربوو، پیرۆزباهی ل سەرۆك بارزانی كر ب هەلكەفتا وەرگرتنا نیشانا بلند یا قەداسەتا پاپایێ ڤاتیكانێ، و رۆلێ دیرۆكی یێ سەرۆك بارزانی د پاراستنا مافێن پێكهاتەیان و ب هێزكرنا فەرهەنگا پێكڤەژیان و تەباییێ د ناڤبەرا هەموو پێكهاتەیێن نەتەوەیی و ئایینی یێن كوردستانێ و ئیراقێ دا ب بلند هەلسەنگاند.
هەر د وێ دیدارێ دا، سەرۆك بارزانی سوپاسییا قەداسەتا پاپایێ ڤاتیكانێ كر و دوپاتی ل سەر وێ چەندێ كر كو ئەم سەربلندین ب وێ كو فەرهەنگا دەولەمەندا پێكڤەژیان و تەباییێ د ناڤبەرا ئایین و نەتەوەیێن جودا دا بۆ مە مایە، و ئەو پشتڕاستی ژی دا كو ئەڤ فەرهەنگە دێ یا پاراستی بیت و دێ پتر هێتە ب هێزكرن. هەروەسا دەستخوەشی ل ئەرك و وەستیانا بەرپرسێ نڤیسینگەها پەیوەندییێن ئێكەتییا ئۆرۆپا كر د دەمێ كاركرنا وی دا ل هەرێما كوردستانێ و هیڤییا سەركەفتنێ بۆ خواست.
مەترسی و دەلیڤەیێن ل هەمبەر ئیراقێ و دەڤەرێ د قووناغا داهاتی دا و پرۆسەیا سیاسی یا هەرێما كوردستانێ تەوەرێن دی یێن وێ دیدارێ بوون.
