2200 چەكدارێن پەكەكێ دێ چنە د ناڤ لەشكرێ ئیراقێ دا
پرۆسەیا چەكدامالینا پەكەكێ ب سەرپەرشتییا دەزگەهێ هەوالگرییا توركیایێ و ب هەڤكاری ل گەل عیراقێ و هەرێما كوردستانێ دەستپێدكەت، بڕیارە ب هەزاران چەكدارێن وێ ڕێكخراوێ ڤەگەڕنە توركیا و 2200 چەكدارێن وان ژی ل شنگالێ بچنە د ناڤ ڕێزین لەشكەرێ ئیراقێ دا.
ڕۆژنامەیا «حورییەت» یا نێزیكی حوكمەتا توركیایێ، پێزانینێن نوو دەربارەی پرۆسەیا چەكدامالینا پارتا كاركەرێن كوردستان (پەكەكە) بەلاڤكرن و باس ل وێ چەندێ كریە كو میكانیزمەكا هەڤپشك د ناڤبەرا ئەنقەرە، بەغدا، هەولێر و سلێمانیێ دا ب سەرپەرشتییا دەزگەهێ هەوالگرییا توركیا (میت) هاتییە دیاركرن ژ بۆ ب دووماهیئینانا هەبوونا چەكداری یا وێ ڕێكخراوێ.
ل دووڤ وێ رۆژنامەیێ، چاڤەڕێ دهێت كرن هەتا مەها چریا دوویێ یا بهێت ئەندامێن پەكەكێ چەكێن خوە دانن و ڤەگەڕنە توركیایێ. پرۆسەیا ڕادەستكرنا چەكان ل هەولێر و سلێمانیێ دێ ل دووڤ نەخشەڕێیەكا دیاركری بیت، هەموو چەك دێ هێنە تۆماركرن و دێ كەڤنە د ناڤ لیستا فەرمی دا.
وێ ڕۆژنامەیا توركی ئاماژە ب وێ چەندێ كریە كو دەزگەهێ میت ئەركێ چاڤدێرییا مەیدانی كریە ستوویێ خوە، ژ بۆ پشتراستكرنا ڤالاكرنا شكەفت و كەمپان ل دەڤەرێن هەرێما كوردستانێ. پشتی كۆمكرنا پێزانینان، دەزگەهێ ناڤبری دێ راپۆرتەكێ ئاراستەی جڤاتا ئاسایشا نشتیمانی یا توركیایێ كەت.
پشتی پشتڕاستبوون ژ وێ چەندێ كو پەكەكێ نە بتنێ ل ئیراق و سووریایێ، بەلكو ل ئۆرۆپایێ ژی دووماهی ب هەموو چالاكیێن خوە یێن نەیاسایی ئیناینە، وی دەمی ب بڕیارا جڤاتا ئاسایشا نشتیمانی ڤەگەڕیانا ئەندامێن وێ ڕێكخراوێ بۆ ناڤ توركیایێ دێ دەستپێكەت. هەڤدەم ل گەل ب جهئینانا یاسایا تایبەت ب پرۆسەیا چارەسەریێ، دێ پێداچوون بۆ دۆسییا وان كەسان ژی هێتە كرن یێن نوكە د زیندانان دا.
چاڤەڕێ دهێتە كرن 7000 بۆ 8000 چەكدارێن پەكەكێ ژ ئیراق و سووریایێ ڤەگەڕنە توركیایێ، ئەڤە ژی هەڤدەمە ل گەل ڤەگەڕیانا 8000 كەسێن سڤیل ژ كەمپا مەخمورێ.
یاسایا نوو یا توركیایێ بتنێ ئەندامێن ئاسایی ڤەدگریت، 230 سەركردەیێن بلند و ئەو كەسێن دەستێ وان د كوشتنا راستەوخوە دا هەبوویە یاسا ڤەناگریت.
هەروەسا ل شنگالێ ژی 2200 چەكدارێن سەر ب وێ ڕێكخراوێ دێ چنە د ناڤ ڕیزێن لەشكەرێ ئیراقێ دا.
